zindagi jine ka yun humne sahaara kar liya

zindagī jiine kā yuuñ ham ne sahārā kar liyā

un kā har tīr-e-sitam hañs kar gavārā kar liyā

zehn meñ mahfūz haiñ jalve abhī us shoḳh ke

dil pareshāñ jab huā un kā nazāra kar liyā

dostoñ meñ koī bhī merā nahīñ thā ham-ḳhayāl

is liye ahbāb se maiñ ne kināra kar liyā

ek patthar dil se Takrā.e to ye lagne lagā

ham ne ḳhud apne jigar ko pāra-pāra kar liyā

dekhne vaale bahut the koī samjhā hī nahīñ

āñkhoñ hī āñkhoñ meñ us ne khel saarā kar liyā

jo muqaddar meñ nahīñ thā us ko paane ke liye

is qadar uljhe ke ḳhud apnā ḳhasāra kar liyā

ham faqīroñ ko nahīñ kuchh tar-nivāloñ se ġharaz

rūkhī sūkhī khā ke bhī apnā guzāra kar liyā

us ne taqrīroñ se apnī nafrateñ phailā.īñ thiiñ

shā.irī se ham ne qaa.em bhā.ī-chāra kar liyā

zindagī bhar saath ab us kā nibhānā hai tumheñ

jis ne apne naam 'rahbar' ġham tumhārā kar liyā

zindagi jine ka yun hum ne sahaara kar liya

un ka har tir-e-sitam hans kar gawara kar liya

zehn mein mahfuz hain jalwe abhi us shoKH ke

dil pareshan jab hua un ka nazara kar liya

doston mein koi bhi mera nahin tha ham-KHayal

is liye ahbab se main ne kinara kar liya

ek patthar dil se Takrae to ye lagne laga

hum ne KHud apne jigar ko para-para kar liya

dekhne wale bahut the koi samjha hi nahin

aankhon hi aankhon mein us ne khel sara kar liya

jo muqaddar mein nahin tha us ko pane ke liye

is qadar uljhe ke KHud apna KHasara kar liya

hum faqiron ko nahin kuchh tar-niwalon se gharaz

rukhi sukhi kha ke bhi apna guzara kar liya

us ne taqriron se apni nafraten phailain thin

shairi se hum ne qaem bhai-chaara kar liya

zindagi bhar sath ab us ka nibhana hai tumhein

jis ne apne nam 'rahbar' gham tumhaara kar liya