zindagi ka safar kaThan hai bahut

zindagī kā safar kaThan hai bahut

chal rahī huuñ magar thakan hai bahut

yuuñ to kahne ko hai sharīk-e-safar

phir bhī lekin akelā-pan hai bahut

go ḳhulūs-o-vafā kā hai paikar

us ke lahje meñ par chubhan hai bahut

yaad oḌhī huī hai us kī yuuñ

laash ko jaise ik kafan hai bahut

zindagī hai ajiib uljhan meñ

jī rahī huuñ magar ghuTan hai bahut

maiñ mukammal kabhī na ho paa.ī

zindagī meñ adhūrā-pan hai bahut

ḳhaak huuñ maiñ zamīñ hai merā nasīb

phir bhī uḌne kī kyuuñ lagan hai bahut

zindagī kis kī yaad meñ 'rūbī'

muddatoñ se tirī magan hai bahut

zindagi ka safar kaThan hai bahut

chal rahi hun magar thakan hai bahut

yun to kahne ko hai sharik-e-safar

phir bhi lekin akela-pan hai bahut

go KHulus-o-wafa ka hai paikar

us ke lahje mein par chubhan hai bahut

yaad oDhi hui hai us ki yun

lash ko jaise ek kafan hai bahut

zindagi hai ajib uljhan mein

ji rahi hun magar ghuTan hai bahut

main mukammal kabhi na ho pai

zindagi mein adhura-pan hai bahut

KHak hun main zamin hai mera nasib

phir bhi uDne ki kyun lagan hai bahut

zindagi kis ki yaad mein 'rubi'

muddaton se teri magan hai bahut