zindagi ke nam par dhoka hua achchha hua

zindagī ke naam par dhokā huā achchhā huā

jo huā jo bhī huā jaisā huā achchhā huā

khā rahā thā dhīre dhīre ye sukūt-e-jāñ mujhe

mahshar-e-jāñ jā-ba-jā barpā huā achchhā huā

ho ke bāġhī aañkh se aañsū girā ruḳhsār par

sohbat-e-hijrāñ vahī dariyā huā achchhā huā

le rahī thī siskiyāñ qirtās par tahrīr-e-jāñ

zā.iqa tahrīr kā kaḌvā huā achchhā huā

uñgliyāñ uThne lagīñ thiiñ hasrat-e-be-nām par

hasratoñ kā aks ab dhuñdlā huā achchhā huā

thī mazār-e-ishq par minnat kī chādar kī tarah

zindagī terā yahāñ saudā huā achchhā huā

jis mohabbat ke liye duniyā ko Thokar maar dī

aaj us ke naam par rusvā huā achchhā huā

kab talak rahtā salāmat muḳhlisī kā pairahan

gardishoñ ke haath ye melā huā achchhā huā

hosh meñ rahte hue mad.hosh thā sochā nahīñ

rah gayā maiñ jā-ba-jā bikhrā huā achchhā huā

kah ga.ī mauj-e-'nasīmī' dekh kar chehrā mirā

ho gayā dār-o-rasan likkhā huā achchhā huā

zindagi ke nam par dhoka hua achchha hua

jo hua jo bhi hua jaisa hua achchha hua

kha raha tha dhire dhire ye sukut-e-jaan mujhe

mahshar-e-jaan ja-ba-ja barpa hua achchha hua

ho ke baghi aankh se aansu gira ruKHsar par

sohbat-e-hijran wahi dariya hua achchha hua

le rahi thi siskiyan qirtas par tahrir-e-jaan

zaiqa tahrir ka kaDwa hua achchha hua

ungliyan uThne lagin thin hasrat-e-be-nam par

hasraton ka aks ab dhundla hua achchha hua

thi mazar-e-ishq par minnat ki chadar ki tarah

zindagi tera yahan sauda hua achchha hua

jis mohabbat ke liye duniya ko Thokar mar di

aaj us ke nam par ruswa hua achchha hua

kab talak rahta salamat muKHlisi ka pairahan

gardishon ke hath ye mela hua achchha hua

hosh mein rahte hue madhosh tha socha nahin

rah gaya main ja-ba-ja bikhra hua achchha hua

kah gai mauj-e-'nasimi' dekh kar chehra mera

ho gaya dar-o-rasan likkha hua achchha hua