zindagi ke sahra mein kuchh nishan nahin milte

zindagī ke sahrā meñ kuchh nishāñ nahīñ milte

rāste to milte haiñ kārvāñ nahīñ milte

māmtā kī chhāñv kī qadr jo nahīñ karte

dhuup un ko miltī hai sā.ebāñ nahīñ milte

umr bhar safar hī to phir nasīb hotā hai

ghar se jab nikal jaa.eñ āshiyāñ nahīñ milte

apnī apnī duniyā meñ kho ga.e haiñ ham donoñ

tum jahāñ pe milte ho ham vahāñ nahīñ milte

diin ho ki ye duniyā rā.egāñ hī Thahreñ ham

muft meñ to ye āḳhir do-jahāñ nahīñ milte

faisle ke lamhe meñ adl karnā mushkil hai

chashm-dīd logoñ ke kyuuñ bayāñ nahīñ milte

dard kī kitāboñ meñ haath kī lakīroñ meñ

ham ne pā ke dekhā hai ġham kahāñ nahīñ milte

zindagi ke sahra mein kuchh nishan nahin milte

raste to milte hain karwan nahin milte

mamta ki chhanw ki qadr jo nahin karte

dhup un ko milti hai saeban nahin milte

umr bhar safar hi to phir nasib hota hai

ghar se jab nikal jaen aashiyan nahin milte

apni apni duniya mein kho gae hain hum donon

tum jahan pe milte ho hum wahan nahin milte

din ho ki ye duniya raegan hi Thahren hum

muft mein to ye aaKHir do-jahan nahin milte

faisle ke lamhe mein adl karna mushkil hai

chashm-did logon ke kyun bayan nahin milte

dard ki kitabon mein hath ki lakiron mein

hum ne pa ke dekha hai gham kahan nahin milte