zindagi khinch gai mujhse tere abru ki tarah

zindagī khiñch ga.ī mujh se tire abrū kī tarah

apne hī ḳhuun kā pyāsā huuñ lab-e-jū kī tarah

vo sitārā jo mire naam se mansūb huā

dīda-e-shab meñ hai ik āḳhirī aañsū kī tarah

sho.ala-e-soz-e-darūñ sard huā jaatā hai

koī samjhā.e sabā ko ki chale lū kī tarah

koī dīvāna uThe ḳhaak uḌāne ke liye

aaj bhī dasht haiñ phaile hue baazū kī tarah

is bhare shahr meñ kartā huuñ havā se bāteñ

paañv paḌtā hai zamīñ par mirā aahū kī tarah

shabnamī haath baḌhā.ūñ ki khule darvāza

bin khile phuul ke zindāñ meñ huuñ ḳhushbū kī tarah

chāhte haiñ jo 'muzaffar' ġham-e-hastī se farār

baiTh jaa.eñ vo gaḌhā khod ke sādhū kī tarah

zindagi khinch gai mujh se tere abru ki tarah

apne hi KHun ka pyasa hun lab-e-ju ki tarah

wo sitara jo mere nam se mansub hua

dida-e-shab mein hai ek aaKHiri aansu ki tarah

shoala-e-soz-e-darun sard hua jata hai

koi samjhae saba ko ki chale lu ki tarah

koi diwana uThe KHak uDane ke liye

aaj bhi dasht hain phaile hue bazu ki tarah

is bhare shahr mein karta hun hawa se baaten

panw paDta hai zamin par mera aahu ki tarah

shabnami hath baDhaun ki khule darwaza

bin khile phul ke zindan mein hun KHushbu ki tarah

chahte hain jo 'muzaffar' gham-e-hasti se farar

baiTh jaen wo gaDha khod ke sadhu ki tarah