zindagi ki bahaar ho jao

zindagī kī bahār ho jaao

tum mirā e'tibār ho jaao

maiñ tumheñ sochtī rahūñ pal-pal

tum mirā intizār ho jaao

pyaar meñ bebasī nahīñ chaltī

sāhib-e-iḳhtiyār ho jaao

mujh ko apnā shikār kar lo tum

varna merā shikār ho jaao

jaan loge mirī mohabbat ko

dushmanoñ meñ shumār ho jaao

tiir ban jaao tum mohabbat meñ

phir kaleje ke paar ho jaao

kah rahī huuñ tumheñ sharāfat se

bas mire ek baar ho jaao

phuul kab tum se chāhtī huuñ maiñ

mere raste ke ḳhaar ho jaao

tum se mil kar qarār aa jaa.e

is tarah be-qarār ho jaao

mirī āñkhoñ ko dekhne vaalo

aaj dariyā ke paar ho jaao

ek din bas yūñhī 'sabīn' kabhī

us ke hoñToñ kā pyaar ho jaao

zindagi ki bahaar ho jao

tum mera e'tibar ho jao

main tumhein sochti rahun pal-pal

tum mera intizar ho jao

pyar mein bebasi nahin chalti

sahib-e-iKHtiyar ho jao

mujh ko apna shikar kar lo tum

warna mera shikar ho jao

jaan loge meri mohabbat ko

dushmanon mein shumar ho jao

tir ban jao tum mohabbat mein

phir kaleje ke par ho jao

kah rahi hun tumhein sharafat se

bas mere ek bar ho jao

phul kab tum se chahti hun main

mere raste ke KHar ho jao

tum se mil kar qarar aa jae

is tarah be-qarar ho jao

meri aankhon ko dekhne walo

aaj dariya ke par ho jao

ek din bas yunhi 'sabin' kabhi

us ke honTon ka pyar ho jao