zindagi mein baDe KHasare hain

zindagī meñ baḌe ḳhasāre haiñ

chain se kis ne din guzāre haiñ

saath rah ke bhī nyāre nyāre haiñ

ham bhī kyā āsmāñ ke taare haiñ

bas hamīñ āfatoñ ke maare haiñ

varna yāroñ ke vāre-nyāre haiñ

zindagī tere bal nahīñ nikle

ham agar haare tujh se haare haiñ

farq-e-dair-o-haram se kyā lenā

ek dariyā ke do kināre haiñ

nekiyoñ hī kī pāsdārī kī

ham ne bichchhū bhī paar utāre haiñ

chāhe sach ho yaqīñ nahīñ aatā

tum hamāre na ham tumhāre haiñ

kyā kisī ko burā.ī deñ 'nāmī'

ham to apne kiye ke maare haiñ

zindagi mein baDe KHasare hain

chain se kis ne din guzare hain

sath rah ke bhi nyare nyare hain

hum bhi kya aasman ke tare hain

bas hamin aafaton ke mare hain

warna yaron ke ware-nyare hain

zindagi tere bal nahin nikle

hum agar haare tujh se haare hain

farq-e-dair-o-haram se kya lena

ek dariya ke do kinare hain

nekiyon hi ki pasdari ki

hum ne bichchhu bhi par utare hain

chahe sach ho yaqin nahin aata

tum hamare na hum tumhaare hain

kya kisi ko burai den 'nami'

hum to apne kiye ke mare hain