zindagi mein usko kaif-e-zindagi hasil nahin

zindagī meñ us ko kaif-e-zindagī hāsil nahīñ

jis kā dil rāz-o-niyāz-e-ishq ke qābil nahīñ

husn ke parde meñ ho saktā nahīñ hargiz qarār

roz-e-avval se ye lailā ḳhūgar-e-mahmil nahīñ

qadr kar dil kī ki dargāh-e-ḳhudā meñ ai nadīm

do-jahāñ kī ne.amateñ hāzir haiñ lekin dil nahīñ

hoshiyār ai mast-o-madhosh-e-javānī hoshiyār

ishq vo dariyā hai jo minnat-kash-e-sāhil nahīñ

zabt-e-nāla zabt-e-girya zabt-e-ulfat zabt-e-shauq

kis tarah kah duuñ ki ye āsāniyāñ mushkil nahīñ

apnā rasta apnī dhun apnā tasavvur apnā shauq

koī bhī rahbaro yahāñ begāna-e-manzil nahīñ

hai tasavvur ishrat-e-māzī kā ā.īna-ba-dast

dil vahī dil hai magar vo garmī-e-mahfil nahīñ

der kyā hai aa mire dil meñ samā jā barq-e-nāz

shikva-sanjī fitrat-e-ehsān meñ dāḳhil nahīñ

iltimās-e-shauq par 'ehsān' mahshar Dah gayā

un kā sharmā kar ye kahnā maiñ tire qābil nahīñ

zindagi mein us ko kaif-e-zindagi hasil nahin

jis ka dil raaz-o-niyaz-e-ishq ke qabil nahin

husn ke parde mein ho sakta nahin hargiz qarar

roz-e-awwal se ye laila KHugar-e-mahmil nahin

qadr kar dil ki ki dargah-e-KHuda mein ai nadim

do-jahan ki neamaten hazir hain lekin dil nahin

hoshiyar ai mast-o-madhosh-e-jawani hoshiyar

ishq wo dariya hai jo minnat-kash-e-sahil nahin

zabt-e-nala zabt-e-girya zabt-e-ulfat zabt-e-shauq

kis tarah kah dun ki ye aasaniyan mushkil nahin

apna rasta apni dhun apna tasawwur apna shauq

koi bhi rahbaro yahan begana-e-manzil nahin

hai tasawwur ishrat-e-mazi ka aaina-ba-dast

dil wahi dil hai magar wo garmi-e-mahfil nahin

der kya hai aa mere dil mein sama ja barq-e-naz

shikwa-sanji fitrat-e-ehsan mein daKHil nahin

iltimas-e-shauq par 'ehsan' mahshar Dah gaya

un ka sharma kar ye kahna main tere qabil nahin