zindagi mein zabt paida kar diya

zindagī meñ zabt paidā kar diyā

us ke ġham ne dekhiye kyā kar diyā

aql-o-dil ne go chhupāyā raaz ko

āñso.oñ ne phir bhī rusvā kar diyā

us kī aahaT thī yā merā vahm thā

dil meñ jis ne hashr barpā kar diyā

jab chalī thī saath meñ ik aas thī

rāste ne mujh ko tanhā kar diyā

kis kī nazreñ phir masīhā ban ga.iiñ

kis ne mere dil ko zinda kar diyā

ek maddham sī kiran ne yak-ba-yak

ḳhvāb ko mere sunahrā kar diyā

aas kā marham diyā yuuñ aap ne

zaḳhm-e-dil kuchh aur gahrā kar diyā

rah ga.ī thī āzmā.ish kyā koī

jaañ ne kyoñ jaane meñ vaqfa kar diyā

duur 'nik.hat' gulsitāñ se ho ga.ī

is havā ne khel kaisā kar diyā

zindagi mein zabt paida kar diya

us ke gham ne dekhiye kya kar diya

aql-o-dil ne go chhupaya raaz ko

aansoon ne phir bhi ruswa kar diya

us ki aahaT thi ya mera wahm tha

dil mein jis ne hashr barpa kar diya

jab chali thi sath mein ek aas thi

raste ne mujh ko tanha kar diya

kis ki nazren phir masiha ban gain

kis ne mere dil ko zinda kar diya

ek maddham si kiran ne yak-ba-yak

KHwab ko mere sunahra kar diya

aas ka marham diya yun aap ne

zaKHm-e-dil kuchh aur gahra kar diya

rah gai thi aazmaish kya koi

jaan ne kyon jaane mein waqfa kar diya

dur 'nikhat' gulsitan se ho gai

is hawa ne khel kaisa kar diya