zindagi rain-basere ke siwa kuchh bhi nahin

zindagī rain-basere ke sivā kuchh bhī nahīñ

ye nafas umr ke phere ke sivā kuchh bhī nahīñ

jise nādān kī bolī meñ sadī kahte haiñ

vo ghaḌī shaam savere ke sivā kuchh bhī nahīñ

dil kabhī shahr-e-sadā-rañg huā kartā thā

ab to ujḌe hue Dere ke sivā kuchh bhī nahīñ

haath meñ biin hai kānoñ kī lavoñ meñ baale

ye riyā-kār sapere ke sivā kuchh bhī nahīñ

saañs ke lahriye jhoñkoñ se phaTā jaatā hai

jism kāġhaz ke pharere ke sivā kuchh bhī nahīñ

aaj insān kā chehra to hai sūraj kī tarah

ruuh meñ ghor añdhere ke sivā kuchh bhī nahīñ

vaqt hī se hai sharaf dast-e-duā ko hāsil

bandagī sāñjh-savere ke sivā kuchh bhī nahīñ

faqr maḳhdūm hai laj-pāl hai lakh-dātā hai

taaj be-rahm luTere ke sivā kuchh bhī nahīñ

zindagi rain-basere ke siwa kuchh bhi nahin

ye nafas umr ke phere ke siwa kuchh bhi nahin

jise nadan ki boli mein sadi kahte hain

wo ghaDi sham sawere ke siwa kuchh bhi nahin

dil kabhi shahr-e-sada-rang hua karta tha

ab to ujDe hue Dere ke siwa kuchh bhi nahin

hath mein bin hai kanon ki lawon mein baale

ye riya-kar sapere ke siwa kuchh bhi nahin

sans ke lahriye jhonkon se phaTa jata hai

jism kaghaz ke pharere ke siwa kuchh bhi nahin

aaj insan ka chehra to hai suraj ki tarah

ruh mein ghor andhere ke siwa kuchh bhi nahin

waqt hi se hai sharaf dast-e-dua ko hasil

bandagi sanjh-sawere ke siwa kuchh bhi nahin

faqr maKHdum hai laj-pal hai lakh-data hai

taj be-rahm luTere ke siwa kuchh bhi nahin