zindagi sach ki himayat nahin karne deti

zindagī sach kī himāyat nahīñ karne detī

aisī koī bhī ibādat nahīñ karne detī

maslahat aql se kahtī hai ki ik had meñ raho

aur dil ko bhī sharārat nahīñ karne detī

uljhī rahtī hai nazar se koī duzdīda-nazar

qalb-o-jāñ kī jo hifāzat nahīñ karne detī

ab to hāl-e-dil-e-bīmār ḳhudā hī jaane

hālat-e-zār ayādat nahīñ karne detī

ham judā.ī meñ to bezār nahīñ the aise

kyā mohabbat ye rifāqat nahīñ karne detī

kaam kuchh karne nahīñ dete riyāsat ko bhī ham

aur kuchh ham ko riyāsat nahīñ karne detī

terī jannat ko tarastī huī terī duniyā

terī duniyā pe qanā.at nahīñ karne detī

tishnagī mohr-ba-lab tishna-labī hai ab to

chashm-e-sāqī kī shikāyat nahīñ karne detī

sham-e-jāñ bhuul ga.ī kaise bhaḌak uThnā thā

shām-e-ġham sub.h-e-qayāmat nahīñ karne detī

irtiqā kī to himāyat meñ ġhazal hai 'pinhāñ'

bas rivāyat se baġhāvat nahīñ karne detī

zindagi sach ki himayat nahin karne deti

aisi koi bhi ibaadat nahin karne deti

maslahat aql se kahti hai ki ek had mein raho

aur dil ko bhi shararat nahin karne deti

uljhi rahti hai nazar se koi duzdida-nazar

qalb-o-jaan ki jo hifazat nahin karne deti

ab to haal-e-dil-e-bimar KHuda hi jaane

haalat-e-zar ayaadat nahin karne deti

hum judai mein to bezar nahin the aise

kya mohabbat ye rifaqat nahin karne deti

kaam kuchh karne nahin dete riyasat ko bhi hum

aur kuchh hum ko riyasat nahin karne deti

teri jannat ko tarasti hui teri duniya

teri duniya pe qanaat nahin karne deti

tishnagi mohr-ba-lab tishna-labi hai ab to

chashm-e-saqi ki shikayat nahin karne deti

sham-e-jaan bhul gai kaise bhaDak uThna tha

sham-e-gham subh-e-qayamat nahin karne deti

irtiqa ki to himayat mein ghazal hai 'pinhan'

bas riwayat se baghawat nahin karne deti