zindagi se umr-bhar tak chalne ka wada kiya

zindagī se umr-bhar tak chalne kā va.ada kiyā

ai mirī kambaḳht sāñso haa.e tum ne kyā kiyā

ibtidā-e-hosh se achchhā-bhalā patthar thā maiñ

ik nazar bas dekh kar tū ne mujhe dariyā kiyā

ek bas ḳhāmosh se lamhe kī ḳhvāhish hī to thī

aur usī ḳhvāhish ne lekin shor phir kitnā kiyā

lutf ab dene lagī hai ye udāsī bhī mujhe

shukriya terā ki tū ne jo kiyā achchhā kiyā

sochtā huuñ kaun se ilzām aur ab rah ga.e

haañ tujhe chāhā tujhe puujā tirā sajda kiyā

dī nahīñ tasvīr apnī tū ne dīvāne ko jab

yuuñ kiyā vallāh us ne ḳhud ko hī tujh sā kiyā

kab talak āḳhir ye sahtī rahtī ḳhvāboñ kī tapish

tañg aa kar niiñd ne palkoñ se lo tauba kiyā

zindagi se umr-bhar tak chalne ka wada kiya

ai meri kambaKHt sanso hae tum ne kya kiya

ibtida-e-hosh se achchha-bhala patthar tha main

ek nazar bas dekh kar tu ne mujhe dariya kiya

ek bas KHamosh se lamhe ki KHwahish hi to thi

aur usi KHwahish ne lekin shor phir kitna kiya

lutf ab dene lagi hai ye udasi bhi mujhe

shukriya tera ki tu ne jo kiya achchha kiya

sochta hun kaun se ilzam aur ab rah gae

han tujhe chaha tujhe puja tera sajda kiya

di nahin taswir apni tu ne diwane ko jab

yun kiya wallah us ne KHud ko hi tujh sa kiya

kab talak aaKHir ye sahti rahti KHwabon ki tapish

tang aa kar nind ne palkon se lo tauba kiya