zindagi silsila-e-wahm-o-guman hai yaro

zindagī silsila-e-vahm-o-gumāñ hai yaaro

dil-e-betāb ko taskīn kahāñ hai yaaro

vahī sayyād kī ghāteñ haiñ vahī kunj-e-qafas

fasl-e-gul rehn-e-ġham-e-jaur-e-ḳhizāñ hai yaaro

vahī afkār kī uljhan vahī māhaul kā jabr

zehn pā-basta-e-zanjīr-e-girāñ hai yaaro

vahī hasrat vahī lab aur vahī mohar-e-sukūt

shauq ko jur.at-e-iz.hār kahāñ hai yaaro

azm kī rah bhī vahī raah meñ kāñTe bhī vahī

duur kosoñ marī manzil kā nishāñ hai yaaro

bevafā.ī kā ḳhudārā mujhe ilzām na do

tum pe hāl-e-dil-e-betāb ayaañ hai yaaro

kaash maiñ kah bhī sakūñ kaash koī sun bhī sake

aah vo raaz ki jo rāz-e-nihāñ hai yaaro

mere hoñToñ pe hai ik naġhma-e-be-saut-o-sadā

dil meñ ik mahshar-e-fariyād-o-fuġhāñ hai yaaro

ik taġhāful ki jo hai vaj.h-e-pareshānī-e-dil

ek yaad in kī hai jo rāhat-e-jāñ hai yaaro

aaj sāhil ke qarīñ Dūbne vaalā hai 'majīd'

nāḳhudā ko to pukāro vo kahāñ hai yaaro

zindagi silsila-e-wahm-o-guman hai yaro

dil-e-betab ko taskin kahan hai yaro

wahi sayyaad ki ghaten hain wahi kunj-e-qafas

fasl-e-gul rehn-e-gham-e-jaur-e-KHizan hai yaro

wahi afkar ki uljhan wahi mahaul ka jabr

zehn pa-basta-e-zanjir-e-giran hai yaro

wahi hasrat wahi lab aur wahi mohar-e-sukut

shauq ko jurat-e-izhaar kahan hai yaro

azm ki rah bhi wahi rah mein kanTe bhi wahi

dur koson mari manzil ka nishan hai yaro

bewafai ka KHudara mujhe ilzam na do

tum pe haal-e-dil-e-betab ayan hai yaro

kash main kah bhi sakun kash koi sun bhi sake

aah wo raaz ki jo raaz-e-nihan hai yaro

mere honTon pe hai ek naghma-e-be-saut-o-sada

dil mein ek mahshar-e-fariyaad-o-fughan hai yaro

ek taghaful ki jo hai wajh-e-pareshani-e-dil

ek yaad in ki hai jo rahat-e-jaan hai yaro

aaj sahil ke qarin Dubne wala hai 'majid'

naKHuda ko to pukaro wo kahan hai yaro