zindagi thoDi si mohlat to kabhi di hoti

zindagī thoḌī sī mohlat to kabhī dī hotī

zinda rahne kī ijāzat to kabhī dī hotī

chāñd ne haath mirā pyaar se thāmā hotā

chāñdnī chhūne kī mohlat to kabhī dī hotī

kitne kho.e hue lamhoñ kā ḳhayāl aatā hai

DhūñDne kī koī ruḳhsat to kabhī dī hotī

aap ke shikva-e-bejā kā gila kyā karnā

aap ne apnī mohabbat to kabhī dī hotī

koī iz.hār-e-vafā aap se kaise kartā

baat kah dene kī jur.at to kabhī dī hotī

apnī hī aañch meñ jalne ke liye is dil ko

sho.ala-e-ishq kī hiddat to kabhī dī hotī

kāġhzī phuul nigāhoñ ko bhale hoñ lekin

un galoñ ko koī nik.hat to kabhī dī hotī

jazb kā raqs khule aam nahīñ hai achchhā

karb-e-ehsās ko ḳhalvat to kabhī dī hotī

saḳht lahjoñ ke ravayyoñ ko badalne ke liye

'nūr' jazboñ ko nazākat to kabhī dī hotī

zindagi thoDi si mohlat to kabhi di hoti

zinda rahne ki ijazat to kabhi di hoti

chand ne hath mera pyar se thama hota

chandni chhune ki mohlat to kabhi di hoti

kitne khoe hue lamhon ka KHayal aata hai

DhunDne ki koi ruKHsat to kabhi di hoti

aap ke shikwa-e-beja ka gila kya karna

aap ne apni mohabbat to kabhi di hoti

koi izhaar-e-wafa aap se kaise karta

baat kah dene ki jurat to kabhi di hoti

apni hi aanch mein jalne ke liye is dil ko

shoala-e-ishq ki hiddat to kabhi di hoti

kaghzi phul nigahon ko bhale hon lekin

un galon ko koi nikhat to kabhi di hoti

jazb ka raqs khule aam nahin hai achchha

karb-e-ehsas ko KHalwat to kabhi di hoti

saKHt lahjon ke rawayyon ko badalne ke liye

'nur' jazbon ko nazakat to kabhi di hoti