zindagi tujhse hamein ab koi shikwa hi nahin

zindagī tujh se hameñ ab koī shikva hī nahīñ

ab to vo haal hai jiine kī tamannā hī nahīñ

intihā ishq kī hai ā.ina-e-dil pe mire

mā-sivā us ke koī aks ubhartā hī nahīñ

mere afkār ko detī hai jilā us kī jafā

ġham na hote to ye qirtās sañvartā hī nahīñ

mujh ko haq baat ke kahne meñ ta.ammul kyuuñ ho

maiñ vo dīvāna huuñ jo daar se Dartā hī nahīñ

ham ki ḳhvāboñ se bahal jaate the lekin afsos

jāgtī āñkhoñ se to ḳhvāb kā rishta hī nahīñ

maiñ ki sūraj hū idhar Duubā udhar ubharūñgā

maiñ vo tairāk nahīñ huuñ jo ubhartā hī nahīñ

vaqt ke saath badalne lagā har ik 'shafīq'

jaise ab mujh se kisī kā koī rishta hī nahīñ

zindagi tujh se hamein ab koi shikwa hi nahin

ab to wo haal hai jine ki tamanna hi nahin

intiha ishq ki hai aaina-e-dil pe mere

ma-siwa us ke koi aks ubharta hi nahin

mere afkar ko deti hai jila us ki jafa

gham na hote to ye qirtas sanwarta hi nahin

mujh ko haq baat ke kahne mein tammul kyun ho

main wo diwana hun jo dar se Darta hi nahin

hum ki KHwabon se bahal jate the lekin afsos

jagti aankhon se to KHwab ka rishta hi nahin

main ki suraj hu idhar Duba udhar ubharunga

main wo tairak nahin hun jo ubharta hi nahin

waqt ke sath badalne laga har ek 'shafiq'

jaise ab mujh se kisi ka koi rishta hi nahin