zindagi zard zard chehron mein

zindagī zard zard chehroñ meñ

bhiik Daalī ga.ī hai kāsoñ meñ

ham se kyā pūchhte ho rang-e-jahāñ

ham to zindoñ meñ haiñ na murdoñ meñ

dil-e-ma.asūm TuuT TuuT gayā

ham saje rah ga.e dūkānoñ meñ

so.e hote haiñ apne ghar meñ ham

paa.e jaate haiñ un kī galiyoñ meñ

ab kitāboñ meñ bhī nahīñ miltā

pyaar hotā thā pahle logoñ meñ

yā-ilāhī bas us kī ek jhalak

jis kī ḳhushbū hai merī sāñsoñ meñ

chhān dekhī hai mashriqain kī ḳhaak

aan baiThā huuñ tere qadmoñ meñ

'nāzish' aisā qalandarāna mizāj

koī hogā to hogā sadiyoñ meñ

zindagi zard zard chehron mein

bhik Dali gai hai kason mein

hum se kya puchhte ho rang-e-jahan

hum to zindon mein hain na murdon mein

dil-e-masum TuT TuT gaya

hum saje rah gae dukanon mein

soe hote hain apne ghar mein hum

pae jate hain un ki galiyon mein

ab kitabon mein bhi nahin milta

pyar hota tha pahle logon mein

ya-ilahi bas us ki ek jhalak

jis ki KHushbu hai meri sanson mein

chhan dekhi hai mashriqain ki KHak

aan baiTha hun tere qadmon mein

'nazish' aisa qalandarana mizaj

koi hoga to hoga sadiyon mein