ziya-e-subh-e-tabassum ki aarzu na karo

ziyā-e-sub.h-e-tabassum kī aarzū na karo

ki taak meñ abhī tīra-shabī hai be-ḳhabaro

samā sakeñge na bikhre hue hasīñ jalve

hisār-e-chashm abhī aur kuchh kushāda karo

jo paḌh sako to ye ḳhāmosh-o-bad-numā chehre

ḳhud apne vaqt kī tārīḳh bhī haiñ dīda-varo

ḳhushī kī dhuup meñ jaltā hai zindagī kā badan

ġham-e-latīf ke saa.e kahāñ hameñ ham-safaro

ruḳh-e-hayāt pe raqsāñ hai jo ḳhushī kī tarah

vo soz-e-ishq kī adnā kiran hai be-basro

hamīñ se sub.h-e-banaras hamīñ se shām-e-avadh

hamīñ se dillī kī galiyāñ hasīñ thiiñ tāj-varo

gavāhī dete haiñ tārīḳh-e-ahd ke safhe

ye aur baat hai ab tum na e'tirāf karo

ḳhizāñ ko rang-e-bahārāñ jo de sako 'nāzim'

kabhī bahār-e-gurezāñ kī justujū na karo

ziya-e-subh-e-tabassum ki aarzu na karo

ki tak mein abhi tira-shabi hai be-KHabaro

sama sakenge na bikhre hue hasin jalwe

hisar-e-chashm abhi aur kuchh kushada karo

jo paDh sako to ye KHamosh-o-bad-numa chehre

KHud apne waqt ki tariKH bhi hain dida-waro

KHushi ki dhup mein jalta hai zindagi ka badan

gham-e-latif ke sae kahan hamein ham-safaro

ruKH-e-hayat pe raqsan hai jo KHushi ki tarah

wo soz-e-ishq ki adna kiran hai be-basro

hamin se subh-e-banaras hamin se sham-e-awadh

hamin se dilli ki galiyan hasin thin taj-waro

gawahi dete hain tariKH-e-ahd ke safhe

ye aur baat hai ab tum na e'tiraf karo

KHizan ko rang-e-bahaaran jo de sako 'nazim'

kabhi bahaar-e-gurezan ki justuju na karo