zohd kis kis ne luTae hain tumhein kya malum

zohd kis kis ne luTā.e haiñ tumheñ kyā ma.alūm

aaj vo kyā nazar aa.e haiñ tumheñ kyā ma.alūm

tum ko begāne bhī apnāte haiñ maiñ jāntā huuñ

mere apne bhī parā.e haiñ tumheñ kyā ma.alūm

kitnī vīrān haiñ be-nūr haiñ āñkheñ merī

ye diye kis ne bujhā.e haiñ tumheñ kyā ma.alūm

shauq-e-āvāra ko sahrā-e-farāmoshī meñ

rāste DhūñDne aa.e haiñ tumheñ kyā ma.alūm

ahl-e-dil hasrat-e-dil le ke tumhāre dar par

aaj kis bhes meñ aa.e haiñ tumheñ kyā ma.alūm

dekh kar haal hamārā na hañso ġhurbat meñ

kaun haiñ kis tarah aa.e haiñ tumheñ kyā ma.alūm

'saif' ye dard se ma.amūr ḳharābe dil ke

kitnī mushkil se basā.e haiñ tumheñ kyā ma.alūm

zohd kis kis ne luTae hain tumhein kya malum

aaj wo kya nazar aae hain tumhein kya malum

tum ko begane bhi apnate hain main jaanta hun

mere apne bhi parae hain tumhein kya malum

kitni viran hain be-nur hain aankhen meri

ye diye kis ne bujhae hain tumhein kya malum

shauq-e-awara ko sahra-e-faramoshi mein

raste DhunDne aae hain tumhein kya malum

ahl-e-dil hasrat-e-dil le ke tumhaare dar par

aaj kis bhes mein aae hain tumhein kya malum

dekh kar haal hamara na hanso ghurbat mein

kaun hain kis tarah aae hain tumhein kya malum

'saif' ye dard se mamur KHarabe dil ke

kitni mushkil se basae hain tumhein kya malum