zor paida jism o jaan ki na-tawani se hua

zor paidā jism o jaañ kī nā-tavānī se huā

shor shahroñ meñ musalsal be-zabānī se huā

der tak kī zindagī kī ḳhvāhisheñ us but ko haiñ

shauq us ko intihā kā umr-e-fānī se huā

maiñ huā nākām apnī be-yaqīnī ke sabab

jo huā sab mere dil kī bad-gumānī se huā

hai nishāñ merā bhī shāyad shash-jihāt-e-dahr meñ

ye gumāñ mujh ko ḳhud apnī be-nishānī se huā

thā 'munīr' āġhāz hī se rāsta apnā ġhalat

is kā andāza safar kī rā.igānī se huā

zor paida jism o jaan ki na-tawani se hua

shor shahron mein musalsal be-zabani se hua

der tak ki zindagi ki KHwahishen us but ko hain

shauq us ko intiha ka umr-e-fani se hua

main hua nakaam apni be-yaqini ke sabab

jo hua sab mere dil ki bad-gumani se hua

hai nishan mera bhi shayad shash-jihat-e-dahr mein

ye guman mujh ko KHud apni be-nishani se hua

tha 'munir' aaghaz hi se rasta apna ghalat

is ka andaza safar ki raigani se hua