zulf-e-KHamdar mein nur-e-ruKH-e-zeba dekho

zulf-e-ḳhamdār meñ nūr-e-ruḳh-e-zebā dekho

chashm-e-baddūr mirā husn-e-tamannā dekho

ab vo ārā.ish-e-gesū se huā hai fāriġh

ab agar himmat-e-mūsā ho to jalva dekho

bahr-e-dīdār karo dīda-e-majnūñ paidā

jur.at-e-shauq se phir jalva-e-lailā dekho

aaj phir shauq-e-dil-e-zār kī qismat jaagī

aaj phir us ne mujhe pyaar se dekhā dekho

nigah-e-lutf se dekhā hai to Thahro kuchh der

ab mire dil ke dhaḌakne kā tamāsha dekho

jo masīhā.ī se aarī haiñ unheñ kyā ma.alūm

apne bīmār ko tum ḳhud hī ḳhudārā dekho

ḳhud chale aao abhī tār-e-nafas hai baaqī

ho nahīñ pā.egā phir dil kā mudāvā dekho

aa gayā hai vo yahāñ nūr-e-sahar kī mānind

khul gayā jabki mire dil kā darīcha dekho

be-sabab zulm kī āñdhī na chalāo mujh par

yuuñ ujaḌ jā.egā gulzār-e-tamannā dekho

tum ko kuchh yaad hai ghar ghar meñ mirā charchā thā

ab usī shahr meñ phirtā huuñ maiñ tanhā dekho

jo riyā-kār haiñ un se na baḌhāo peñgeñ

chashm-e-iḳhlās meñ ho jāoge rusvā dekho

jis kī bīnā.ī se ik shahr huā thā raushan

aaj be-nūr hai vo dīda-e-bīnā dekho

ye samajh lo ki vo hai ilm-o-hunar kā madfan

jab kisī shahr meñ tum ġhalba-e-mullā dekho

zulf-e-KHamdar mein nur-e-ruKH-e-zeba dekho

chashm-e-baddur mera husn-e-tamanna dekho

ab wo aaraish-e-gesu se hua hai farigh

ab agar himmat-e-musa ho to jalwa dekho

bahr-e-didar karo dida-e-majnun paida

jurat-e-shauq se phir jalwa-e-laila dekho

aaj phir shauq-e-dil-e-zar ki qismat jagi

aaj phir us ne mujhe pyar se dekha dekho

nigah-e-lutf se dekha hai to Thahro kuchh der

ab mere dil ke dhaDakne ka tamasha dekho

jo masihai se aari hain unhen kya malum

apne bimar ko tum KHud hi KHudara dekho

KHud chale aao abhi tar-e-nafas hai baqi

ho nahin paega phir dil ka mudawa dekho

aa gaya hai wo yahan nur-e-sahar ki manind

khul gaya jabki mere dil ka daricha dekho

be-sabab zulm ki aandhi na chalao mujh par

yun ujaD jaega gulzar-e-tamanna dekho

tum ko kuchh yaad hai ghar ghar mein mera charcha tha

ab usi shahr mein phirta hun main tanha dekho

jo riya-kar hain un se na baDhao pengen

chashm-e-iKHlas mein ho jaoge ruswa dekho

jis ki binai se ek shahr hua tha raushan

aaj be-nur hai wo dida-e-bina dekho

ye samajh lo ki wo hai ilm-o-hunar ka madfan

jab kisi shahr mein tum ghalba-e-mulla dekho