zulf o ruKH ke sae mein zindagi guzari hai

zulf o ruḳh ke saa.e meñ zindagī guzārī hai

dhuup bhī hamārī hai chhāñv bhī hamārī hai

ġham-gusār chehroñ par e'tibār mat karnā

shahr meñ siyāsat ke dost bhī shikārī hai

moḌ lene vaalī hai, zindagī koī shāyad

ab ke phir havāoñ meñ ek be-qarārī hai

haal ḳhuuñ meñ Duubā hai kal na jaane kyā hogā

ab ye ḳhauf-e-mustaqbil zehn zehn taarī hai

mere hī buzurgoñ ne sar-bulandiyāñ baḳhshīñ

mere hī qible par mashq-e-sañg-bārī hai

ik ajiib ThanDak hai is ke narm lahje meñ

lafz lafz shabnam hai baat baat pyārī hai

kuchh to pā.eñge us kī qurbatoñ kā ḳhamyāza

dil to ho chuke TukḌe ab saroñ kī baarī hai

baap bojh Dhotā thā kyā jahez de paatā

is liye vo shahzādī aaj tak kuñvārī hai

kah do 'mīr' o 'ġhālib' se ham bhī sher kahte haiñ

vo sadī tumhārī thī ye sadī hamārī hai

karbalā nahīñ lekin jhuuT aur sadāqat meñ

kal bhī jañg jaarī thī ab bhī jañg jaarī hai

gaañv meñ mohabbat kī rasm hai abhī 'manzar'

shahr meñ hamāre to jo bhī hai madārī hai

zulf o ruKH ke sae mein zindagi guzari hai

dhup bhi hamari hai chhanw bhi hamari hai

gham-gusar chehron par e'tibar mat karna

shahr mein siyasat ke dost bhi shikari hai

moD lene wali hai, zindagi koi shayad

ab ke phir hawaon mein ek be-qarari hai

haal KHun mein Duba hai kal na jaane kya hoga

ab ye KHauf-e-mustaqbil zehn zehn tari hai

mere hi buzurgon ne sar-bulandiyan baKHshin

mere hi qible par mashq-e-sang-bari hai

ek ajib ThanDak hai is ke narm lahje mein

lafz lafz shabnam hai baat baat pyari hai

kuchh to paenge us ki qurbaton ka KHamyaza

dil to ho chuke TukDe ab saron ki bari hai

bap bojh Dhota tha kya jahez de pata

is liye wo shahzadi aaj tak kunwari hai

kah do 'mir' o 'ghaalib' se hum bhi sher kahte hain

wo sadi tumhaari thi ye sadi hamari hai

karbala nahin lekin jhuT aur sadaqat mein

kal bhi jang jari thi ab bhi jang jari hai

ganw mein mohabbat ki rasm hai abhi 'manzar'

shahr mein hamare to jo bhi hai madari hai