zulm yaad aae kabhi un ke sitam yaad aae

zulm yaad aa.e kabhī un ke sitam yaad aa.e

ye bajā hai ki ba andāz-e-karam yaad aa.e

pher liiñ apnoñ ne ġhairoñ kī tarah jab āñkheñ

kis qadar us ghaḌī ġhairoñ ke karam yaad aa.e

na milā jab kisī sūrat rah-e-hastī kā surāġh

kārvānoñ ko mire naqsh-e-qadam yaad aa.e

aish ke din rahe ġhairoñ ke liye sab maḳhsūs

vaqt jab saḳht paḌā koī to ham yaad aa.e

dekh kar ġhairoñ kī be-laus vafā ko 'manzar'

bebasī meñ hameñ apnoñ ke sitam yaad aa.e

zulm yaad aae kabhi un ke sitam yaad aae

ye baja hai ki ba andaz-e-karam yaad aae

pher lin apnon ne ghairon ki tarah jab aankhen

kis qadar us ghaDi ghairon ke karam yaad aae

na mila jab kisi surat rah-e-hasti ka suragh

karwanon ko mere naqsh-e-qadam yaad aae

aish ke din rahe ghairon ke liye sab maKHsus

waqt jab saKHt paDa koi to hum yaad aae

dekh kar ghairon ki be-laus wafa ko 'manzar'

bebasi mein hamein apnon ke sitam yaad aae