zulmat-gah-e-dauran mein subh-e-chaman-e-dil hun

zulmat-gah-e-daurāñ meñ sub.h-e-chaman-e-dil huuñ

roko na safar merā maiñ qismat-e-manzil huuñ

zindāni-e-hastī huuñ pāband-e-salāsil huuñ

kis tarah milūñ tum se ḳhud raah meñ haa.il huuñ

barbād sahī lekin barbād-e-ġham-e-dil huuñ

āñkhoñ se lagā mujh ko gard-e-rah-e-manzil huuñ

ai sañg-ba-kaf duniyā aa shauq se aa lekin

āhista qadam rakhnā maiñ shīsha-gah-e-dil huuñ

mauj-e-ġham-e-jānāñ ho yā mauj-e-ġham-e-daurāñ

aane do mire dil tak har mauj kā sāhil huuñ

hastī ko ġham-e-ālam aalam ko ġham-e-hastī

zindāñ se bayābāñ tak ik silsila-e-dil huuñ

tum mahv-e-ḳhud-ārā.ī meñ ālam-e-tanhā.ī

tum mahfil-e-ḳhalvat ho maiñ ḳhalvat-e-mahfil huuñ

ḳhuun apnī tamannā kā ḳhud kis ne kiyā hogā

mujh par na taras khaao bismil nahīñ qātil huuñ

gulshan se 'shamīm' āḳhir kis tarah guzar jaa.eñ

har phuul ye kahtā hai maiñ pyaar ke qābil huuñ

zulmat-gah-e-dauran mein subh-e-chaman-e-dil hun

roko na safar mera main qismat-e-manzil hun

zindani-e-hasti hun paband-e-salasil hun

kis tarah milun tum se KHud rah mein hail hun

barbaad sahi lekin barbaad-e-gham-e-dil hun

aankhon se laga mujh ko gard-e-rah-e-manzil hun

ai sang-ba-kaf duniya aa shauq se aa lekin

aahista qadam rakhna main shisha-gah-e-dil hun

mauj-e-gham-e-jaanan ho ya mauj-e-gham-e-dauran

aane do mere dil tak har mauj ka sahil hun

hasti ko gham-e-alam aalam ko gham-e-hasti

zindan se bayaban tak ek silsila-e-dil hun

tum mahw-e-KHud-arai mein aalam-e-tanhai

tum mahfil-e-KHalwat ho main KHalwat-e-mahfil hun

KHun apni tamanna ka KHud kis ne kiya hoga

mujh par na taras khao bismil nahin qatil hun

gulshan se 'shamim' aaKHir kis tarah guzar jaen

har phul ye kahta hai main pyar ke qabil hun