zulmat-kadon mein kal jo shua-e-sahar gai

zulmat-kadoñ meñ kal jo shuā-e-sahar ga.ī

tārīki-e-hayāt yakāyak ubhar ga.ī

nazzāra-e-jamāl kī fursat kahāñ milī

pahlī nazar nazar kī hadoñ se guzar ga.ī

iz.hār-e-iltifāt ke baad un kī be-ruḳhī

ik rañg aur naqsh-e-tamannā meñ bhar ga.ī

zauq-e-junūñ o jazba-e-bebāk kyā mile

vīrān ho ke bhī mirī duniyā sañvar ga.ī

ab daur-e-kārsāzi-e-vahshat nahīñ rahā

ab ārzū-e-lazzat-e-raqs-e-sharar ga.ī

ik daaġh bhī jabīñ pe merī aa gayā to kyā

shoḳhī to un ke naqsh-e-qadam kī ubhar ga.ī

taare se jhilmilāte haiñ mizhgān-e-yār par

shāyad nigāh-e-yās bhī kuchh kaam kar ga.ī

tum ne to ik karam hī kiyā haal pūchh kar

ab jo guzar ga.ī mire dil par guzar ga.ī

jalve hue jo aam to tāb-e-nazar na thī

parde paḌe hue the jahāñ tak nazar ga.ī

saarā qusūr us nigah-e-fitna-jū kā thā

lekin balā nigāh-e-tamannā ke sar ga.ī

zulmat-kadon mein kal jo shua-e-sahar gai

tariki-e-hayat yakayak ubhar gai

nazzara-e-jamal ki fursat kahan mili

pahli nazar nazar ki hadon se guzar gai

izhaar-e-iltifat ke baad un ki be-ruKHi

ek rang aur naqsh-e-tamanna mein bhar gai

zauq-e-junun o jazba-e-bebak kya mile

viran ho ke bhi meri duniya sanwar gai

ab daur-e-karsazi-e-wahshat nahin raha

ab aarzu-e-lazzat-e-raqs-e-sharar gai

ek dagh bhi jabin pe meri aa gaya to kya

shoKHi to un ke naqsh-e-qadam ki ubhar gai

tare se jhilmilate hain mizhgan-e-yar par

shayad nigah-e-yas bhi kuchh kaam kar gai

tum ne to ek karam hi kiya haal puchh kar

ab jo guzar gai mere dil par guzar gai

jalwe hue jo aam to tab-e-nazar na thi

parde paDe hue the jahan tak nazar gai

sara qusur us nigah-e-fitna-ju ka tha

lekin bala nigah-e-tamanna ke sar gai