nafas nafas mein hain tarikiyan kahan rakh dun

nafas nafas meñ haiñ tārīkiyāñ kahāñ rakh duuñ

maiñ ik charāġh ujāle kahāñ kahāñ rakh duuñ

hai ik zamāne kī in se mirī shanāsā.ī

tumhīñ kaho ki ye tanhā.iyāñ kahāñ rakh duuñ

uḌā rahe haiñ sab apnī uḌaan ke qisse

maiñ apne TuuTe paroñ ke bayāñ kahāñ rakh duuñ

chhupā.ūñ shāhjahāñ se maiñ ḳhud ko laakh magar

jo taaj gaḌhtī haiñ vo uñgliyāñ kahāñ rakh duuñ

hasad kī ret hai hadd-e-nigāh tak 'akhilesh'

maiñ ye ḳhulūs kī kashtī kahāñ kahāñ rakh duuñ

nafas nafas mein hain tarikiyan kahan rakh dun

main ek charagh ujale kahan kahan rakh dun

hai ek zamane ki in se meri shanasai

tumhin kaho ki ye tanhaiyan kahan rakh dun

uDa rahe hain sab apni uDan ke qisse

main apne TuTe paron ke bayan kahan rakh dun

chhupaun shahjahan se main KHud ko lakh magar

jo taj gaDhti hain wo ungliyan kahan rakh dun

hasad ki ret hai hadd-e-nigah tak 'akhilesh'

main ye KHulus ki kashti kahan kahan rakh dun