zamana aa gaya ruswaiyon tak tum nahin aae

zamāna aa gayā rusvā.iyoñ tak tum nahīñ aa.e

javānī aa ga.ī tanhā.iyoñ tak tum nahīñ aa.e

dharā par tham ga.ī āñdhī gagan meñ kāñptī bijlī

ghaTā.eñ aa ga.iiñ amrā.iyoñ tak tum nahīñ aa.e

nadī ke haath nirjhar ko milī paatī samundar ko

satah bhī aa ga.ī gahrā.iyoñ tak tum nahīñ aa.e

kisī ko dekhte hī aap ko ābhās hotā hai

nigāheñ aa ga.iiñ parchhā.iyoñ tak tum nahīñ aa.e

samāpan ho gayā nabh meñ sitāroñ kī sabhāoñ kā

udāsī aa ga.ī añgḌā.iyoñ tak tum nahīñ aa.e

na sham.a hai na parvāne ye kaisā rang-e-mahfil hai

ki mātam aa gayā shahnā.iyoñ tak tum nahīñ aa.e

zamana aa gaya ruswaiyon tak tum nahin aae

jawani aa gai tanhaiyon tak tum nahin aae

dhara par tham gai aandhi gagan mein kanpti bijli

ghaTaen aa gain amraiyon tak tum nahin aae

nadi ke hath nirjhar ko mili pati samundar ko

satah bhi aa gai gahraiyon tak tum nahin aae

kisi ko dekhte hi aap ko aabhas hota hai

nigahen aa gain parchhaiyon tak tum nahin aae

samapan ho gaya nabh mein sitaron ki sabhaon ka

udasi aa gai angDaiyon tak tum nahin aae

na shama hai na parwane ye kaisa rang-e-mahfil hai

ki matam aa gaya shahnaiyon tak tum nahin aae