marsiya-e-sir-sayyad radif ye

arsh ke nuurī zamīñ ke farsh par aane ko haiñ

aur ik ḳhākī ko sair-e-ḳhuld dikhlāne ko haiñ

bāġh-e-jannat ko sidhārā sayyad-e-ālī-maqām

raah meñ us kī malā.ek nuur barsāne ko haiñ

vā.e-hasrat chal diyā duniyā se vo mahbūb-e-qaum

aur jo baaqī haiñ us ke hijr meñ jaane ko haiñ

sāqī-e-marhūm tere bāda-ḳhvāroñ ke liye

ḳhūn-e-dil piine ko aur laḳht-e-jigar khāne ko haiñ

gulshan-e-millat meñ ġhunchoñ ne abhī kholī thī aañkh

ek jhoñke se ḳhizāñ ke ab vo murjhāne ko haiñ

chhup gayā vo rū-e-raḳhshāñ mehr-e-ālam-tāb kā

ab shab-e-yaldā kī har-sū zulmateñ chhāne ko haiñ

ai shah-e-be-tāj vo mātam kī tere dhuum hai

tāj-dāroñ ke alam is ġham se jhuk jaane ko haiñ

dasht meñ duuñ lag rahī hai qais ke mātam meñ aaj

āhuvān-e-najd kī āñkhoñ meñ ashk aane ko haiñ

ek siine meñ thī sayyad ke taḌap islām kī

ham musalmāñ sab barā.e naam kahlāne ko haiñ

kārvān-e-qaum kā hañgāma tere dam se thā

ye na thā ma.alūm hazrat kuuch farmāne ko haiñ

bosa-gāh-e-qaum hogā tere sañg-e-āstāñ

naqsh-e-pā par tere lākhoñ qāfile aane ko haiñ

har zamāñ iiñ rahguzar rā kārvān-e-dīgar ast

kushtagān-e-ishq rā har laḳht jān-e-digar ast

haa.e vo ḳhurshīd-e-anvar chehra-e-tābāñ tirā

haa.e vo māh-e-munavvar āriz-e-raḳhshāñ tirā

vo nigāheñ jāñ-fazā aur vo adā.eñ dil-rubā

vo jabīn-e-dil-kushā vo dil-faroz unvāñ tirā

haa.e us rīsh-e-mubārak par vo bārish nuur kī

shām-e-pīrī meñ bayāz-e-sub.h nūr-afshāñ tirā

haa.e vo jān-e-basīrat terā nūrānī dimāġh

haa.e vo kān-e-mohabbat sīna-e-sozāñ tirā

vo tirī shān-e-jalālī vo tirā ro.ab-e-jamāl

paḌ ga.ī jis par nazar thā banda-e-farmāñ tirā

mehdī-o-mushtāq hamdam shiblī-o-hālī nadīm

aur zain-ul-ābdīñ ḳhāsā.ī-e-ḳhāsāñ tirā

bām-o-dar collage ke haiñ mātam meñ tere sar nigūñ

marsiyāñ-ḳhvāñ ban gayā har kāḳh-o-har-aivāñ tirā

dil se ḳhisht-o-sañg ke collage meñ uThtī hai sadā

kyā huā mīr-e-imārat ḳhāna-e-vīrāñ tirā

tā-jahāñ meñ hai tire naanā kī ummat ko baqā

qaum meñ mātam rahegā sayyad-ahmad-ḳhāñ tirā

banda-parvar vaqt-e-ruḳhsat yaad farmāyā na kyuuñ

nāzir-e-mahjūr thā vābasta-e-dāmāñ tirā

ai chaman pairā-e-millat tere shauq-e-dīd meñ

thā navā-sañj-e-fuġhāñ ye bulbul-e-bustāñ tirā

sar-ba-sahrā ab raheñge aah dīvāne tere

sham-e-turbat kā kareñge tauf parvāne tire

haa.e bazm-e-qaum meñ ab jalva farmā.egā kaun

maah ke mānind haale meñ nazar aa.egā kaun

ai masīhā qaum ke tujh bin izām-e-ḳhasta ko

qum-be-iznī kah ke ab jumbish meñ phir lā.egā kaun

dekh kar chitvan tirī uThte the dil meñ valvale

is nigāh-e-garm se ab dil ko garmā.egā kaun

thā tirā rū-e-munavvar ek najm-e-rahnumā

ab vo nūrānī fazā zulmat meñ dikhlā.egā kaun

us shuā-e-rūh-parvar se phir ai māh-e-munīr

dil ke dariyā meñ vo raqs-e-mauj dikhlā.egā kaun

ḳhāna-jañgī har taraf hai ma.ashar-e-islām meñ

haa.e tujh bin in ke ye uljhāo suljhā.egā kaun

dār-o-gīr-e-dahr misl-e-arsa-e-shatranj hai

yār-e-shātir ban ke is kī chaal batlā.egā kaun

ghuggiyoñ kā ruup bhar kar qaum kī stage par

mā namī ḳhvāhem nañg-o-nām rā gā.egā kaun

ruuTh kar jaatā hai sayyad aao leñ is ko manā

varna itnī mushkileñ āsān farmā.egā kaun

dafn karnā sahn meñ collage ke sir-sayyad kī laash

is ḳhalīlullāh se ka.abe ko chhuḌvā.egā kaun

yuuñ to lākhoñ ā.eñge is najd meñ aur jā.eñge

sayyad ahmad sā junūñ-sāmāñ magar aa.egā kaun

ai harīfāñ aañ qadah ba-shikast-o-āñ saaqī numānd

jur.a-e-juz ashk-e-ḳhūñ dar jām-e-mā baaqī numānd

sayyad-e-marhūm ummat kā bhalā kartā rahā

fikr-e-millat roz-o-shab sub.h-o-masā kartā rahā

jo falāh-e-qaum kī aa.ī samajh meñ us kī baat

barmalā kahtā rahā aur barmalā kartā rahā

thī use parvāh-e-tahsīñ aur na kuchh nafrīñ kā Dar

us ko jo karnā thā be-rū-o-riyā kartā rahā

nā-sazā suntā rahā aur marhabā kahtā rahā

kufr ke fatvoñ meñ kaam islām kā kartā rahā

gar hue nākāmiyoñ se hausle yāroñ ke past

himmat-e-ālī kā apnī iqtizā kartā rahā

qaum meñ phir taaza zauq-e-but-parastī dekh kar

ik nayā ka.aba aligarh meñ banā kartā rahā

ai ki collage ke ye qasr-o-ḳhāk-o-aivāñ dekhiye

kaam jo shāhoñ kā thā so ye gadā kartā rahā

us ne kī islām aur auhām-e-bātil meñ tamīz

zañg se ā.īna-e-dīñ kī jilā kartā rahā

kufr ke hamloñ meñ thā islām kī daa.im sipar

ālam-e-ummat ye kār-e-ambiyā kartā rahā

shāhid-e-urdu kī zulfoñ ke nikāle pech-o-ḳham

husn ke ġhamzoñ ko fitrat-āshnā kartā rahā

ye chalī thī ummat-e-marhūm sail-e-ġhadr meñ

maut ke tūfāñ meñ kār-e-nāḳhudā kartā rahā

zindagī sayyad kī thī qalb-e-tapāñ kī zindagī

thī jahāñ kī zindagī jān-e-jahāñ kī zindagī

chhup gayā vo mehr-e-tābāñ bazm-e-daurāñ chhoḌ kar

matl.a-e-ummīd kā tārīk unvāñ chhoḌ kar

fasl-e-gul meñ vo chalā bazm-e-gulistāñ chhoḌ kar

shāḳh saare aarzū ke gul-ba-dāmāñ chhoḌ kar

nāla-e-dil-doz sahn-e-bostāñ meñ sar kiyā

bulbulān-e-zār ne daras-e-gulistāñ chhoḌ kar

aa liyā sail-e-fanā ne kārvāñ sālār ko

qāfile ko dasht-e-hirmāñ meñ pareshāñ chhoḌ kar

pīr-e-kan.āñ kī judā.ī se jigar hai paash paash

go chalā hai misr meñ vo māh-e-kan.āñ chhoḌ kar

so gayā kunj-e-lahad meñ shāh-e-be-tāj-o-sarīr

bāġh-o-rāġh-o-bārgāh-o-qasr-o-aivāñ chhoḌ kar

faiz se tere rahī vābasta hāsil kī ummīd

tishna-lab kahtī na jaa.e abr-e-naisāñ chhoḌ kar

ye to batlā de ki hai kis kā sahārā qaum ko

ka.aba-e-dil qibla-e-jāñ terā dāmāñ chhoḌ kar

kaun hogā mard-e-maidāñ ab masāf-e-dahr kā

haath meñ kis ke chalā hai go vo chaugāñ chhoḌ kar

banda-parvar ye junūn-e-ishq ke shāyāñ na thā

sair-e-gulzār-e-iram ḳhār-e-muġhīlāñ chhoḌ kar

gāhe-gāhe qaum kī hālat pe bhī karnā nazar

sair-e-jannat chhoḌ kar gul-gasht-e-rizvāñ chhoḌ kar

is chaman meñ ruuh mañDlātī rahegī aap kī

jā.egī bulbul kahāñ bazm-e-gulistāñ chhoḌ kar

dār-e-fānī kī hai 'nāzir' garche faanī zindagī

kushtagān-e-ishq kī hai jāvedānī zindagī

arsh ke nuri zamin ke farsh par aane ko hain

aur ek KHaki ko sair-e-KHuld dikhlane ko hain

bagh-e-jannat ko sidhaara sayyad-e-ali-maqam

rah mein us ki malaek nur barsane ko hain

wae-hasrat chal diya duniya se wo mahbub-e-qaum

aur jo baqi hain us ke hijr mein jaane ko hain

saqi-e-marhum tere baada-KHwaron ke liye

KHun-e-dil pine ko aur laKHt-e-jigar khane ko hain

gulshan-e-millat mein ghunchon ne abhi kholi thi aankh

ek jhonke se KHizan ke ab wo murjhane ko hain

chhup gaya wo ru-e-raKHshan mehr-e-alam-tab ka

ab shab-e-yalda ki har-su zulmaten chhane ko hain

ai shah-e-be-taj wo matam ki tere dhum hai

taj-daron ke alam is gham se jhuk jaane ko hain

dasht mein dun lag rahi hai qais ke matam mein aaj

aahuwan-e-najd ki aankhon mein ashk aane ko hain

ek sine mein thi sayyad ke taDap islam ki

hum musalman sab barae nam kahlane ko hain

karwan-e-qaum ka hangama tere dam se tha

ye na tha malum hazrat kuch farmane ko hain

bosa-gah-e-qaum hoga tere sang-e-astan

naqsh-e-pa par tere lakhon qafile aane ko hain

har zaman in rahguzar ra karwan-e-digar ast

kushtagan-e-ishq ra har laKHt jaan-e-digar ast

hae wo KHurshid-e-anwar chehra-e-taban tera

hae wo mah-e-munawwar aariz-e-raKHshan tera

wo nigahen jaan-faza aur wo adaen dil-ruba

wo jabin-e-dil-kusha wo dil-faroz unwan tera

hae us rish-e-mubarak par wo barish nur ki

sham-e-piri mein bayaz-e-subh nur-afshan tera

hae wo jaan-e-basirat tera nurani dimagh

hae wo kan-e-mohabbat sina-e-sozan tera

wo teri shan-e-jalali wo tera roab-e-jamal

paD gai jis par nazar tha banda-e-farman tera

mehdi-o-mushtaq hamdam shibli-o-haali nadim

aur zain-ul-abdin KHasai-e-KHasan tera

baam-o-dar collage ke hain matam mein tere sar nigun

marsiyan-KHwan ban gaya har kaKH-o-har-aiwan tera

dil se KHisht-o-sang ke collage mein uThti hai sada

kya hua mir-e-imarat KHana-e-viran tera

ta-jahan mein hai tere nana ki ummat ko baqa

qaum mein matam rahega sayyad-ahmad-KHan tera

banda-parwar waqt-e-ruKHsat yaad farmaya na kyun

nazir-e-mahjur tha wabasta-e-daman tera

ai chaman paira-e-millat tere shauq-e-did mein

tha nawa-sanj-e-fughan ye bulbul-e-bustan tera

sar-ba-sahra ab rahenge aah diwane tere

sham-e-turbat ka karenge tauf parwane tere

hae bazm-e-qaum mein ab jalwa farmaega kaun

mah ke manind haale mein nazar aaega kaun

ai masiha qaum ke tujh bin izam-e-KHasta ko

qum-be-izni kah ke ab jumbish mein phir laega kaun

dekh kar chitwan teri uThte the dil mein walwale

is nigah-e-garm se ab dil ko garmaega kaun

tha tera ru-e-munawwar ek najm-e-rahnuma

ab wo nurani faza zulmat mein dikhlaega kaun

us shua-e-ruh-parwar se phir ai mah-e-munir

dil ke dariya mein wo raqs-e-mauj dikhlaega kaun

KHana-jangi har taraf hai mashar-e-islam mein

hae tujh bin in ke ye uljhao suljhaega kaun

dar-o-gir-e-dahr misl-e-arsa-e-shatranj hai

yar-e-shatir ban ke is ki chaal batlaega kaun

ghuggiyon ka rup bhar kar qaum ki stage par

ma nami KHwahem nang-o-nam ra gaega kaun

ruTh kar jata hai sayyad aao len is ko mana

warna itni mushkilen aasan farmaega kaun

dafn karna sahn mein collage ke sir-sayyad ki lash

is KHalilullah se kabe ko chhuDwaega kaun

yun to lakhon aaenge is najd mein aur jaenge

sayyad ahmad sa junun-saman magar aaega kaun

ai harifan aan qadah ba-shikast-o-an saqi numand

jura-e-juz ashk-e-KHun dar jam-e-ma baqi numand

sayyad-e-marhum ummat ka bhala karta raha

fikr-e-millat roz-o-shab subh-o-masa karta raha

jo falah-e-qaum ki aai samajh mein us ki baat

barmala kahta raha aur barmala karta raha

thi use parwah-e-tahsin aur na kuchh nafrin ka Dar

us ko jo karna tha be-ru-o-riya karta raha

na-saza sunta raha aur marhaba kahta raha

kufr ke fatwon mein kaam islam ka karta raha

gar hue nakaamiyon se hausle yaron ke past

himmat-e-ali ka apni iqtiza karta raha

qaum mein phir taza zauq-e-but-parasti dekh kar

ek naya kaba aligarh mein bana karta raha

ai ki collage ke ye qasr-o-KHak-o-aiwan dekhiye

kaam jo shahon ka tha so ye gada karta raha

us ne ki islam aur auham-e-baatil mein tamiz

zang se aaina-e-din ki jila karta raha

kufr ke hamlon mein tha islam ki daim sipar

aalam-e-ummat ye kar-e-ambiya karta raha

shahid-e-urdu ki zulfon ke nikale pech-o-KHam

husn ke ghamzon ko fitrat-ashna karta raha

ye chali thi ummat-e-marhum sail-e-ghadr mein

maut ke tufan mein kar-e-naKHuda karta raha

zindagi sayyad ki thi qalb-e-tapan ki zindagi

thi jahan ki zindagi jaan-e-jahan ki zindagi

chhup gaya wo mehr-e-taban bazm-e-dauran chhoD kar

matla-e-ummid ka tarik unwan chhoD kar

fasl-e-gul mein wo chala bazm-e-gulistan chhoD kar

shaKH sare aarzu ke gul-ba-daman chhoD kar

nala-e-dil-doz sahn-e-bostan mein sar kiya

bulbulan-e-zar ne daras-e-gulistan chhoD kar

aa liya sail-e-fana ne karwan salar ko

qafile ko dasht-e-hirman mein pareshan chhoD kar

pir-e-kanan ki judai se jigar hai pash pash

go chala hai misr mein wo mah-e-kanan chhoD kar

so gaya kunj-e-lahad mein shah-e-be-taj-o-sarir

bagh-o-ragh-o-bargah-o-qasr-o-aiwan chhoD kar

faiz se tere rahi wabasta hasil ki ummid

tishna-lab kahti na jae abr-e-naisan chhoD kar

ye to batla de ki hai kis ka sahaara qaum ko

kaba-e-dil qibla-e-jaan tera daman chhoD kar

kaun hoga mard-e-maidan ab masaf-e-dahr ka

hath mein kis ke chala hai go wo chaugan chhoD kar

banda-parwar ye junun-e-ishq ke shayan na tha

sair-e-gulzar-e-iram KHar-e-mughilan chhoD kar

gahe-gahe qaum ki haalat pe bhi karna nazar

sair-e-jannat chhoD kar gul-gasht-e-rizwan chhoD kar

is chaman mein ruh manDlati rahegi aap ki

jaegi bulbul kahan bazm-e-gulistan chhoD kar

dar-e-fani ki hai 'nazir' garche fani zindagi

kushtagan-e-ishq ki hai jawedani zindagi