faqat chand nusKHon ka hai wo safina

faqat chand nusḳhoñ kā hai vo safīna

chale aa.e haiñ jo ki sīna-ba-sīna

na un ko nabātāt se āgahī hai

na aslan ḳhabar ma.adiniyyāt kī hai

na tashrīh keī lai kisī par khulī hai

na ilm-e-tabī.ī na chemistry hai

na paanī kā ilm aur na ilm-e-havā hai

marīzoñ kā un ke nigahbāñ ḳhudā hai

na qānūn meñ un ke koī ḳhatā hai

na maḳhzan meñ añgusht rakhne keī jā hai

saidī meñ likkhā hai jo kuchh bajā hai

nafīsī ke har qaul par jaañ fidā hai

salaf likh ga.e jo qayās aur gumāñ se

sahīfe haiñ utre hue āsmāñ se

vo sher aur qasā.ed kā nāpāk daftar

ufūnat meñ sanDās se jo hai bad-tar

zamīñ jis se hai zalzale meñ barābar

malak jis se sharmāte haiñ āsmāñ par

huā ilm-o-dīñ jis se tārāj saarā

vo ilmoñ meñ ilm-e-adab hai hamārā

burā sher kahne keī gar kuchh sazā hai

abas jhuuT baknā agar nāravā hai

to vo mahkama jis kā qaazī ḳhudā hai

muqarrar jahāñ nek-o-bad keī sazā hai

gunahgār vaañ chhūT jā.eñge saare

jahannam ko bhar deñge shā.ir hamāre

faqat chand nusKHon ka hai wo safina

chale aae hain jo ki sina-ba-sina

na un ko nabaatat se aagahi hai

na aslan KHabar madiniyyat ki hai

na tashrih kei lai kisi par khuli hai

na ilm-e-tabii na chemistry hai

na pani ka ilm aur na ilm-e-hawa hai

marizon ka un ke nigahban KHuda hai

na qanun mein un ke koi KHata hai

na maKHzan mein angusht rakhne kei ja hai

saidi mein likkha hai jo kuchh baja hai

nafisi ke har qaul par jaan fida hai

salaf likh gae jo qayas aur guman se

sahife hain utre hue aasman se

wo sher aur qasaed ka napak daftar

ufunat mein sanDas se jo hai bad-tar

zamin jis se hai zalzale mein barabar

malak jis se sharmate hain aasman par

hua ilm-o-din jis se taraj sara

wo ilmon mein ilm-e-adab hai hamara

bura sher kahne kei gar kuchh saza hai

abas jhuT bakna agar narawa hai

to wo mahkama jis ka qazi KHuda hai

muqarrar jahan nek-o-bad kei saza hai

gunahgar wan chhuT jaenge sare

jahannam ko bhar denge shair hamare