BT-nama

ham-navā kaun sī ummīd pe ḳhāmosh rahūñ

kis liye shāhid-e-b-T kī maiñ pā-posh rahūñ

chiiz kyā hai sag-e-college ki maiñ ḳhargosh rahūñ

kyuuñ zayāñ-kār bannūñ sūd-farāmosh rahūñ

aaj maiñ b-T liye dast-o-girebāñ hūñgā

nāsehā paas na aanā ki maiñ nādāñ hūñgā

maiñ to samjhā thā ki B-T hai koī kār-e-savāb

dekhī andar se magar aa ke jo ye ḳhāna-ḳharāb

mujh ko mahsūs huā ye to hai godām azaab

jis meñ maiñ jhoñkā gayā aisā ki juuñ pā-ba-jarāb

dil-e-insāñ kī nazākat ise malhūz nahīñ

haañ sharīfoñ kī sharāfat bhī to mahfūz nahīñ

zulm-e-B-T se ḳhudā jāntā hai chuur haiñ ham

jo ki kīkar pe chaḌhāyā thā vo añgūr haiñ ham

''qissa-e-dard sunāte haiñ ki majbūr haiñ ham''

jin ko samjhe ho khilaune vo ham insān nahīñ

rab ke bande haiñ koī sāḳhta-jāpān nahīñ

B-T kyā hai ye faqat bandoñ kā haivāñ honā

aur makrūh sī kuchh Tāñgoñ kā uryāñ honā

Lean ke hukm pe ġham khānā pareshāñ honā

ham se be-hūdgī har roz ye farmāte haiñ

sub.h bhī shaam bhī jab chāheñ ye karvāte haiñ

maz.hab-e-B-T meñ kyā nāġha harām hotā hai

sar pe har sub.h ye kyuuñ raunakī-rām hotā hai

bhūltā hai na use ghar kā hī kaam hotā hai

na buḳhār aatā hai us ko na zukām hotā hai

are twitter ye ḳhudā hai to sifārish kar de

gar ye kam-baḳht nahīñ Taltā to bārish kar de

hostel kyā hai tavelā sā banā rakkhā hai

aur vo samjhe haiñ ki firdaus sajā rakkhā hai

baañs par us ko bilā-vaj.h chaḌhā rakkhā hai

dekho darvāze pe rizvāñ jo biThā rakkhā hai

dekheñ DevḌhī pe to mehmān vahī Talte haiñ

is se aage to farishtoñ ke bhī par jalte haiñ

ye bhī pābandī-e-mehmāñ meñ ḳhatā-vār nahīñ

kyūñki hālāt-e-darūñ qābil iz.hār nahīñ

yaañ giraftār-e-balā haiñ jo gunahgār nahīñ

aisī jannat kā to dozaḳh bhī ḳharīdār nahīñ

hostel terī haqīqat ko ga.e haiñ ham pāñch

inDimāñ vāloñ ne lahore meñ kholī hai branch

chhuTTī darkār ho gar tum ko ayādat ke liye

māh-bhar pahle se do arzī ijāzat ke liye

pesh-goī karo nā-dīda musībat ke liye

goyā paiġhambarī darkār hai ruḳhsat ke liye

izrā.īl aake hameñ apnā programme batā

jin buzurgoñ pe tirī aañkh hai vo naam batā

ai ḳhudā ham bhī the mānūs kabhī ishrat se

ab haiñ mahrūm training meñ tirī rahmat se

bach nahīñ sakte kabhī raat kī is kulfat se

din ko paḌh paḌh ke fanā ho ga.e ik muddat se

dard-e-sar hai ki flue hai ki tap-e-khāñsī hai

umr-bhar qaidī kā anjām yahāñ phāñsī hai

ham-nawa kaun si ummid pe KHamosh rahun

kis liye shahid-e-b-T ki main pa-posh rahun

chiz kya hai sag-e-college ki main KHargosh rahun

kyun zayan-kar bannun sud-faramosh rahun

aaj main b-T liye dast-o-gireban hunga

naseha pas na aana ki main nadan hunga

main to samjha tha ki B-T hai koi kar-e-sawab

dekhi andar se magar aa ke jo ye KHana-KHarab

mujh ko mahsus hua ye to hai godam azab

jis mein main jhonka gaya aisa ki jun pa-ba-jarab

dil-e-insan ki nazakat ise malhuz nahin

han sharifon ki sharafat bhi to mahfuz nahin

zulm-e-B-T se KHuda jaanta hai chur hain hum

jo ki kikar pe chaDhaya tha wo angur hain hum

qissa-e-dard sunate hain ki majbur hain ham

jin ko samjhe ho khilaune wo hum insan nahin

rab ke bande hain koi saKHta-japan nahin

B-T kya hai ye faqat bandon ka haiwan hona

aur makruh si kuchh Tangon ka uryan hona

Lean ke hukm pe gham khana pareshan hona

hum se be-hudgi har roz ye farmate hain

subh bhi sham bhi jab chahen ye karwate hain

mazhab-e-B-T mein kya nagha haram hota hai

sar pe har subh ye kyun raunaki-ram hota hai

bhulta hai na use ghar ka hi kaam hota hai

na buKHar aata hai us ko na zukaam hota hai

are twitter ye KHuda hai to sifarish kar de

gar ye kam-baKHt nahin Talta to barish kar de

hostel kya hai tawela sa bana rakkha hai

aur wo samjhe hain ki firdaus saja rakkha hai

bans par us ko bila-wajh chaDha rakkha hai

dekho darwaze pe rizwan jo biTha rakkha hai

dekhen DewDhi pe to mehman wahi Talte hain

is se aage to farishton ke bhi par jalte hain

ye bhi pabandi-e-mehman mein KHata-war nahin

kyunki haalat-e-darun qabil izhaar nahin

yan giraftar-e-bala hain jo gunahgar nahin

aisi jannat ka to dozaKH bhi KHaridar nahin

hostel teri haqiqat ko gae hain hum panch

inDiman walon ne lahore mein kholi hai branch

chhuTTi darkar ho gar tum ko ayaadat ke liye

mah-bhar pahle se do arzi ijazat ke liye

pesh-goi karo na-dida musibat ke liye

goya paighambari darkar hai ruKHsat ke liye

izrail aake hamein apna programme bata

jin buzurgon pe teri aankh hai wo nam bata

ai KHuda hum bhi the manus kabhi ishrat se

ab hain mahrum training mein teri rahmat se

bach nahin sakte kabhi raat ki is kulfat se

din ko paDh paDh ke fana ho gae ek muddat se

dard-e-sar hai ki flue hai ki tap-e-khansi hai

umr-bhar qaidi ka anjam yahan phansi hai