buton se ishq gar be-mal-o-zar hoga to kya hoga

butoñ se ishq gar be-māl-o-zar hogā to kyā hogā

phaTīchar kī mohabbat kā asar hogā to kyā hogā

agar darpesh tūfānī safar hogā to kyā hogā

aur aage aage buddhū rāhbar hogā to kyā hogā

karūñ to arz-e-matlab un se lekin Dar ye lagtā hai

agar hogā to kyā hogā magar hogā to kyā hogā

abhī to hazrat-e-vā.iz mazammat mai kī karte haiñ

agar mai-ḳhāne meñ un kā guzar hogā to kyā hogā

tavāf-e-ka.aba par jis roz hoñge shaiḳh āmāda

usī din un kā girje meñ dinner hogā to kyā hogā

abas ai dost hañste ho kisī kī chashm-e-ahval par

tumhārā bhī koī kaanā pisar hogā to kyā hogā

na hañs itnā mirī fahrist-e-isyāñ dekh kar zāhid

tirī fard-e-amal meñ bhī sifar hogā to kyā hogā

ye har pahlū pe dard-e-dil rahegā dard-e-dil hamdam

udhar hogā to kyā hogā idhar hogā to kyā hogā

amal-dār-e-musāvāt aah tū ne ye nahīñ sochā

upper hogā to kyā hogā lower hogā to kyā hogā

hamāre rahbarān-e-qaum-o-millat 'shauq' kyā kam haiñ

vatan meñ gar na koī barber hogā to kyā hogā

buton se ishq gar be-mal-o-zar hoga to kya hoga

phaTichar ki mohabbat ka asar hoga to kya hoga

agar darpesh tufani safar hoga to kya hoga

aur aage aage buddhu rahbar hoga to kya hoga

karun to arz-e-matlab un se lekin Dar ye lagta hai

agar hoga to kya hoga magar hoga to kya hoga

abhi to hazrat-e-waiz mazammat mai ki karte hain

agar mai-KHane mein un ka guzar hoga to kya hoga

tawaf-e-kaba par jis roz honge shaiKH aamada

usi din un ka girje mein dinner hoga to kya hoga

abas ai dost hanste ho kisi ki chashm-e-ahwal par

tumhaara bhi koi kana pisar hoga to kya hoga

na hans itna meri fahrist-e-isyan dekh kar zahid

teri fard-e-amal mein bhi sifar hoga to kya hoga

ye har pahlu pe dard-e-dil rahega dard-e-dil hamdam

udhar hoga to kya hoga idhar hoga to kya hoga

amal-dar-e-musawat aah tu ne ye nahin socha

upper hoga to kya hoga lower hoga to kya hoga

hamare rahbaran-e-qaum-o-millat 'shauq' kya kam hain

watan mein gar na koi barber hoga to kya hoga