chaalis chor

phir ik ḳhabar meñ ye elaan ḳhūbsūrat hai

ki ek farm ko kuchh choroñ kī zarūrat hai

kuchh aaise chor jo choroñ kī dekh-bhāl kareñ

jo pāsbāñ ke farā.ez kā bhī ḳhayāl kareñ

ḳhabar meñ is kī vazāhat na kar sakā aḳhbār

ki kaise chor haiñ mazkūra farm ko darkār

na jaane kaun se choroñ kī farm ko hai talab

tire jahāñ meñ to chālīs chor haiñ yā-rab

diler chor javāñ chor kārobārī chor

tamām shahr meñ bad-nām ishtihārī chor

ajiib chor hunar-mand chor qābil chor

bayāz chor qalam-dān chor file chor

zalīl chor ḳhatarnāk chor shātir chor

faqat nigāh churāne ke fan meñ māhir chor

sharīf sūrat o ma.aqūl chor aslī chor

phaloñ kī tarah faqat mausamī o faslī chor

purāne chor na.e chor ḳhāndānī chor

zamīñ ke rāñda-e-dargāh āsmānī chor

kisī buzurg ke nūr-e-nazar tufailī chor

kisī Dakait ke shāgird sirf zelī chor

safed roza ke pāband allāh vaale chor

namāz o roza ke pāband allāh vaale chor

siyāsiyāt meñ uljhe hue siyāsī chor

sadā-bahār girah-kāT bāra-māsī chor

charāġh-chor qalam-chor raushnā.ī-chor

charāġh-chor ke bhaa.ī diyā-salā.ī chor

jo apne baap kī zid haiñ vo donoñ bhaa.ī chor

vo intihā.ī sharīf aur ye intihā.ī chor

bulandiyoñ se ba-tadrīj nīche girte chor

har ek shahr meñ maujūd chalte phirte chor

sharīf chor mizājan bure nahīñ hote

ki un ke haath meñ chāqū chhure nahīñ hote

ye chor vo haiñ jo karte haiñ shauqiya chorī

ye kyā kareñ ki sharāfat hai in kī kamzorī

jigar ke paas ik aise buzurg aate the

jo un kī jeb se baTvā zarūr uḌāte the

ye rail meñ jo mileñge to so rahe hoñge

ye jab bhī bas meñ khaḌe hoñge ro rahe hoñge

ga.e jo khet meñ kuchh kakḌiyāñ churā laa.e

kabhī jo ban meñ ga.e lakḌiyāñ churā laa.e

kisī kuñ.eñ pe chaḌhe bālTī churā laa.e

kisī sarā.e meñ Thahre darī churā laa.e

ḳhudā ke ghar meñ ga.e rañg hī nayā laa.e

namāziyoñ kī na.ī jūtiyāñ churā laa.e

jo kuchh nahīñ to churā laa.e bair berī se

ye chor baaz nahīñ aate herā-pherī se

kisī mazār pe pahuñche diyā churā laa.e

mushā.ere meñ ga.e qāfiya churā laa.e

ġhazal churā ke kabhī ḳhidmat-e-adab kar lī

pakaḌ ga.e to vahīñ ma.azarat talab kar lī

jo un kā raaz batāne lagā koī bhedī

to ek aadh ġhazal us ko tohfatan de dī

ye chor tanz se qaabū meñ aa nahīñ sakte

mire farishte bhī in ko miTā nahīñ sakte

raheñ na chor ye shā.er ke bas kī baat nahīñ

tamām shahr hai do chaar das kī baat nahīñ

na nazm jis meñ hai choroñ kā zikr bittafsīl

mire ḳhayāl se hai ab bhī tishna-e-takmīl

ye list choroñ kī vaqtī o ittifāqī hai

varaq tamām huā aur mad.h baaqī hai

phir ek KHabar mein ye elan KHubsurat hai

ki ek farm ko kuchh choron ki zarurat hai

kuchh aaise chor jo choron ki dekh-bhaal karen

jo pasban ke faraez ka bhi KHayal karen

KHabar mein is ki wazahat na kar saka aKHbar

ki kaise chor hain mazkura farm ko darkar

na jaane kaun se choron ki farm ko hai talab

tere jahan mein to chaalis chor hain ya-rab

diler chor jawan chor karobari chor

tamam shahr mein bad-nam ishtihaari chor

ajib chor hunar-mand chor qabil chor

bayaz chor qalam-dan chor file chor

zalil chor KHatarnak chor shatir chor

faqat nigah churane ke fan mein mahir chor

sharif surat o maqul chor asli chor

phalon ki tarah faqat mausami o fasli chor

purane chor nae chor KHandani chor

zamin ke randa-e-dargah aasmani chor

kisi buzurg ke nur-e-nazar tufaili chor

kisi Dakait ke shagird sirf zeli chor

safed roza ke paband allah wale chor

namaz o roza ke paband allah wale chor

siyasiyat mein uljhe hue siyasi chor

sada-bahaar girah-kaT bara-masi chor

charagh-chor qalam-chor raushnai-chor

charagh-chor ke bhai diya-salai chor

jo apne bap ki zid hain wo donon bhai chor

wo intihai sharif aur ye intihai chor

bulandiyon se ba-tadrij niche girte chor

har ek shahr mein maujud chalte phirte chor

sharif chor mizajan bure nahin hote

ki un ke hath mein chaqu chhure nahin hote

ye chor wo hain jo karte hain shauqiya chori

ye kya karen ki sharafat hai in ki kamzori

jigar ke pas ek aise buzurg aate the

jo un ki jeb se baTwa zarur uDate the

ye rail mein jo milenge to so rahe honge

ye jab bhi bas mein khaDe honge ro rahe honge

gae jo khet mein kuchh kakDiyan chura lae

kabhi jo ban mein gae lakDiyan chura lae

kisi kunen pe chaDhe baalTi chura lae

kisi sarae mein Thahre dari chura lae

KHuda ke ghar mein gae rang hi naya lae

namaziyon ki nai jutiyan chura lae

jo kuchh nahin to chura lae bair beri se

ye chor baz nahin aate hera-pheri se

kisi mazar pe pahunche diya chura lae

mushaere mein gae qafiya chura lae

ghazal chura ke kabhi KHidmat-e-adab kar li

pakaD gae to wahin mazarat talab kar li

jo un ka raaz batane laga koi bhedi

to ek aadh ghazal us ko tohfatan de di

ye chor tanz se qabu mein aa nahin sakte

mere farishte bhi in ko miTa nahin sakte

rahen na chor ye shaer ke bas ki baat nahin

tamam shahr hai do chaar das ki baat nahin

na nazm jis mein hai choron ka zikr bittafsil

mere KHayal se hai ab bhi tishna-e-takmil

ye list choron ki waqti o ittifaqi hai

waraq tamam hua aur madh baqi hai