dawat-e-walima

ik roz ham bhī dā'vat uḌāne chale ga.e

vā'da jo kar liyā thā nibhāne ga.e chale

begam kī baat ham nahīñ maane chale ga.e

aur family ke saath meñ khāne chale ga.e

Time ke her-pher ne sab ko sikhā diyā

khāne ke intizār ne ham ko pakā diyā

mezoñ pe thī sajī huī har chiiz bar-mahal

ḳhush-bū baḌhā rahī thī bahut bhuuk kā 'amal

biryānī qorma vahīñ roTī aġhal-baġhal

chaTnī achār rā.ita aur chaaT ke the phal

stall meñ sajī huī har shai 'azīm thī

coffē thī cold drink thī icecream thī

khānā shurū' karne kā e'lān jab huā

har samt jaise hashr kā 'ālam huā bapā

kaisā salād kis kā achār aur rā.ita

ik shaḳhs ne plate meñ Dauñgā palaT liyā

ham yuuñ bhaTak rahe the ki jaise haqīr hoñ

ḳhālī plate saath thī jaise faqīr hoñ

begam se thā buland koī qad meñ past thā

farhād kā chachā koī majnūñ-parast thā

josh-e-shabāb meñ koī maġhrūr-o-mast thā

itnā za'īf koī ki lāThī-ba-dast thā

bhagdaḌ meñ kaun detā bhalā phir kisī kā saath

Dauñgā kisī ke haath thā chamcha kisī ke haath

kuchh 'auratoñ ke saath meñ bachche the chulbule

kis baap ke supūt the kis god ke pale

nau das baras ke sin meñ ye himmat ye valvale

kis kī majāl un se koī Dauñgā chhīn le

murġhe kī Taañg pheñk dī aadhī chachoḌ kar

biryānī par jhapaT paḌe roTī ko chhoḌ kar

koī to thā kabāb ke pīchhe paḌā huā

murġhe kī Taañg lene pe koī aḌā huā

Dish ke qarīb koī thā aise khaḌā huā

khambe kī tarh jaise zamīñ meñ gaḌhā huā

biryānī kī talab meñ bhaTaktā huā koī

boTī binā chabā.e saTaktā huā koī

aa.e kabāb-e-sīḳh to hathiyā gayā koī

palle paḌā na kuchh bhī to jhallā gayā koī

chaTnī samajh ke soñTh vahāñ khā gayā koī

aur rā.ite ko khiir meñ auñdhā gayā koī

is haḌbaḌī meñ ho ga.ī kuchh aisī gaḌ-baḌī

puurī plate khiir kī dūlhā pe jā paḌī

pahle to ham bhaTakte rahe bas idhar udhar

sharm-o-hayā ko rakh diyā phir ham ne taaq par

Table pe pahuñche bhiiḌ ko jab chīr-phāḌ kar

Dauñgā uThā ke Daalī jo us par zarā nazar

us meñ na shorbā na hī boTī dikhā.ī dī

ḳhālī plate bhuuk meñ roTī dikhā.ī dī

palle jab apne kuchh na paḌā bhāg-dauḌ kar

hasrat bharī nigāh se khāne ko chhoḌ kar

ham ne salād khā liyā lemū nichoḌ kar

waiter se paanī māñgā jo phir haath joḌ kar

ġhusse se paanī phir gayā us vaqt pyaas par

chāroñ taraf sanī thī lipstick glass par

ek roz hum bhi da'wat uDane chale gae

wa'da jo kar liya tha nibhane gae chale

begam ki baat hum nahin mane chale gae

aur family ke sath mein khane chale gae

Time ke her-pher ne sab ko sikha diya

khane ke intizar ne hum ko paka diya

mezon pe thi saji hui har chiz bar-mahal

KHush-bu baDha rahi thi bahut bhuk ka 'amal

biryani qorma wahin roTi aghal-baghal

chaTni achaar raita aur chaT ke the phal

stall mein saji hui har shai 'azim thi

coffee thi cold drink thi icecream thi

khana shuru' karne ka e'lan jab hua

har samt jaise hashr ka 'alam hua bapa

kaisa salad kis ka achaar aur raita

ek shaKHs ne plate mein Daunga palaT liya

hum yun bhaTak rahe the ki jaise haqir hon

KHali plate sath thi jaise faqir hon

begam se tha buland koi qad mein past tha

farhad ka chacha koi majnun-parast tha

josh-e-shabab mein koi maghrur-o-mast tha

itna za'if koi ki laThi-ba-dast tha

bhagdaD mein kaun deta bhala phir kisi ka sath

Daunga kisi ke hath tha chamcha kisi ke hath

kuchh 'auraton ke sath mein bachche the chulbule

kis bap ke suput the kis god ke pale

nau das baras ke sin mein ye himmat ye walwale

kis ki majal un se koi Daunga chhin le

murghe ki Tang phenk di aadhi chachoD kar

biryani par jhapaT paDe roTi ko chhoD kar

koi to tha kabab ke pichhe paDa hua

murghe ki Tang lene pe koi aDa hua

Dish ke qarib koi tha aise khaDa hua

khambe ki tarh jaise zamin mein gaDha hua

biryani ki talab mein bhaTakta hua koi

boTi bina chabae saTakta hua koi

aae kabab-e-siKH to hathiya gaya koi

palle paDa na kuchh bhi to jhalla gaya koi

chaTni samajh ke sonTh wahan kha gaya koi

aur raite ko khir mein aundha gaya koi

is haDbaDi mein ho gai kuchh aisi gaD-baDi

puri plate khir ki dulha pe ja paDi

pahle to hum bhaTakte rahe bas idhar udhar

sharm-o-haya ko rakh diya phir hum ne taq par

Table pe pahunche bhiD ko jab chir-phaD kar

Daunga uTha ke Dali jo us par zara nazar

us mein na shorba na hi boTi dikhai di

KHali plate bhuk mein roTi dikhai di

palle jab apne kuchh na paDa bhag-dauD kar

hasrat bhari nigah se khane ko chhoD kar

hum ne salad kha liya lemu nichoD kar

waiter se pani manga jo phir hath joD kar

ghusse se pani phir gaya us waqt pyas par

chaaron taraf sani thi lipstick glass par