dum

janāb dum kī ajab nafsiyāt hotī hai

ki is kī jumbish-e-adnā meñ baat hotī hai

vafā ke jazbe kā iz.hār dum hilānā hai

jo dum khaḌī hai vo nafrat kā tāziyāna hai

jo lambī dum hai vo ālī-sifāt hotī hai

jo muḳhtasar hai baḌī vāhiyāt hotī hai

vo jān-dār mukammal nahīñ adhūrā hai

vo jis ke dum nahīñ hotī hai vo lanDūrā hai

jahāñ meñ yuuñ to hai ūñchā maqām insāñ kā

magar lanDūroñ meñ aatā hai naam insāñ kā

maiñ sochtā huuñ jo insāñ ke dum lagī hotī

kasar jo baaqī hai vo bhī na rah ga.ī hotī

vo apnī jaan bachāne ko ye sipar letā

jo haath se nahīñ kar paatā dum se kar letā

kuchh is tarīqe se radd-e-amal huā kartā

guzartī dil pe to dum par asar milā kartā

ḳhushī kā jazba ubhartā to dum uchak jaatī

koī udaas jo hotā to dum laTak jaatī

kisī pe dhoñs jamātā to dum uThā letā

kisī se dhoñs jo khātā to dum dabā letā

buzurg log javānoñ se jab ḳhafā hote

zabāñ pe un ke ye alfāz barmalā hote

tumheñ ḳhabar nahīñ thī kaisī ān-bān kī dum

kaTā ke bech lī tum ne to ḳhāndān kī dum

kahīñ jo fāteh-e-āzam koī khaḌā hotā

mire ḳhayāl meñ yuuñ pose de rahā hotā

baḌe ġhurūr se lahrā rahā hai dum apnī

bajā.e moñchhoñ ke sahlā rahā hai dum apnī

sabhā meñ jab koī dastūr-e-nau banā kartā

shumār-e-rā.e kuchh is tarah se huā kartā

jo log us ke muāfiq haiñ dum uThā leñ vo

jo log us ke muḳhālif haiñ dum girā deñ vo

amiir logoñ kī dum meñ añgūThiyāñ hotīñ

añgūThiyoñ meñ nagīnoñ kī būTiyāñ hotīñ

ghamanD aur bhī baḌh jaatā aur itrāte

ye log jeb-ghaḌī apnī dum meñ laTkāte

hasīn log kisī tarah se nibhā lete

na miltā kuchh to faqat dum ko hī rañgā lete

jo muflisī se kabhī koī apnī jhhallātā

to haspatāl meñ le jā ke dum kaTā aatā

hasīn logoñ kī phūloñ se dum Dhakī hotī

ki phuljhaḌī sī fazāoñ meñ chhuT rahī hotī

dumoñ se phir qad-e-zebā kuchh aur saj jaate

kahāñ kī zulf ki dum hī meñ dil ulajh jaate

ye iftiḳhār jo ham āshiqoñ ko mil jaatā

har ek ġhuncha-e-ummīd dil kā khil jaatā

kisī ko bazm meñ ham apnā yuuñ pata dete

bajā.e paañv dabāne ke dum dabā dete

kabhī kamand kā jo kaam dum se ho jaatā

ham āshiqoñ kā baḌā naam dum se ho jaatā

ishāra kar ke hameñ dum vo apnī laTkāte

ham un ke koThe pe dum ko pakaḌ ke chaḌh jaate

hamārī raah kā har kāñTā phuul ho jaa.e

agar duā ye hamārī qubūl ho jaa.e

ki aadmī ke liye dum bahut zarūrī hai

baġhair dum ke har ik aarzū lanDūrī hai

janab dum ki ajab nafsiyat hoti hai

ki is ki jumbish-e-adna mein baat hoti hai

wafa ke jazbe ka izhaar dum hilana hai

jo dum khaDi hai wo nafrat ka taziyana hai

jo lambi dum hai wo aali-sifat hoti hai

jo muKHtasar hai baDi wahiyat hoti hai

wo jaan-dar mukammal nahin adhura hai

wo jis ke dum nahin hoti hai wo lanDura hai

jahan mein yun to hai uncha maqam insan ka

magar lanDuron mein aata hai nam insan ka

main sochta hun jo insan ke dum lagi hoti

kasar jo baqi hai wo bhi na rah gai hoti

wo apni jaan bachane ko ye sipar leta

jo hath se nahin kar pata dum se kar leta

kuchh is tariqe se radd-e-amal hua karta

guzarti dil pe to dum par asar mila karta

KHushi ka jazba ubharta to dum uchak jati

koi udas jo hota to dum laTak jati

kisi pe dhons jamata to dum uTha leta

kisi se dhons jo khata to dum daba leta

buzurg log jawanon se jab KHafa hote

zaban pe un ke ye alfaz barmala hote

tumhein KHabar nahin thi kaisi aan-ban ki dum

kaTa ke bech li tum ne to KHandan ki dum

kahin jo fateh-e-azam koi khaDa hota

mere KHayal mein yun pose de raha hota

baDe ghurur se lahra raha hai dum apni

bajae monchhon ke sahla raha hai dum apni

sabha mein jab koi dastur-e-nau bana karta

shumar-e-rae kuchh is tarah se hua karta

jo log us ke muafiq hain dum uTha len wo

jo log us ke muKHalif hain dum gira den wo

amir logon ki dum mein anguThiyan hotin

anguThiyon mein naginon ki buTiyan hotin

ghamanD aur bhi baDh jata aur itraate

ye log jeb-ghaDi apni dum mein laTkate

hasin log kisi tarah se nibha lete

na milta kuchh to faqat dum ko hi ranga lete

jo muflisi se kabhi koi apni jhhallata

to haspatal mein le ja ke dum kaTa aata

hasin logon ki phulon se dum Dhaki hoti

ki phuljhaDi si fazaon mein chhuT rahi hoti

dumon se phir qad-e-zeba kuchh aur saj jate

kahan ki zulf ki dum hi mein dil ulajh jate

ye iftiKHar jo hum aashiqon ko mil jata

har ek ghuncha-e-ummid dil ka khil jata

kisi ko bazm mein hum apna yun pata dete

bajae panw dabane ke dum daba dete

kabhi kamand ka jo kaam dum se ho jata

hum aashiqon ka baDa nam dum se ho jata

ishaara kar ke hamein dum wo apni laTkate

hum un ke koThe pe dum ko pakaD ke chaDh jate

hamari rah ka har kanTa phul ho jae

agar dua ye hamari qubul ho jae

ki aadmi ke liye dum bahut zaruri hai

baghair dum ke har ek aarzu lanDuri hai