ek chehlum par

jamīla ab uTTho na aañsū bahāo

nahīñ vaqt rone kā dariyāñ bichhāo

ye duniyā hai faanī gayā jaane vaalā

vo rone se vāpas nahīñ aane vaalā

na be-kār ab tum duhā.ī machāo

uTho apne ghar meñ safā.ī karāo

muazzaz muazzaz jo ā.eñge mehmāñ

bahut naak aur bhauñ chaḌhā.eñgī ammāñ

tum un ke liye jald huqqe mañgāo

miyāñ bhaag kar chaa.e lipton kī laao

vo sab aa ke iz.hār-e-mātam kareñge

vo baiThak meñ ro.eñge chaa.e piyeñge

sunā.eñge marhūm ke vo fasāne

ki lab bolne ko diye haiñ ḳhudā ne

dulhan ne utārā na thā surḳh joḌā

ki dūlhā ne duniyā-e-fānī ko chhoḌā

bahut ḳhūb-sūrat bahut nek thā vo

hazāroñ javānoñ meñ bas ek thā vo

namāz ik bhī hargiz na us ne qazā kī

shab o roz kartā ibādat ḳhudā kī

jidhar dekhte haiñ udhar ġham hī ġham hai

kareñ is kā jitnā bhī mātam vo kam hai

na ro ro ke behāl ho ai dulhan tū

na kar is qadar āh-o-rañj-o-mehan tū

vo jannat meñ ḳhushiyāñ manā.egā mat ro

vo hūroñ se ab dil lagā.egā mat ro

jamīla ḳhudā kī qasam muskurā de

tirī be-qarārī na ham ko rulā de

raziyya zarā garm chāval to laanā

zakiyya zarā ThanDā paanī pilānā

bahut ḳhūb-sūrat bahut nek thā vo

hazāroñ javānoñ meñ bas ek thā vo

jamīla mujhe roġhnī naan denā

vo firnī uThānā vo pakvān denā

judā.ī meñ us ke huā dil divānā

ki lagtā hai achchhā na piinā na khānā

mañgāo polāv zarā aur ḳhāla

baḌhānā zarā qorme kā piyāla

jidhar dekhte haiñ udhar ġham hī ġham hai

kareñ is kā jitnā bhī mātam vo kam hai

vo nannhī ke zarde meñ kishmish hai thoḌī

bahut der se māñgtī hai nigoḌī

vo TukḌā jigar kā thā āñkhoñ kā taarā

hameñ apnī aulād se bhī thā pyārā

paḌā hai polāv meñ ghē DālDe kā

ḳhudā tū hī hāfiz hai mere gale kā

dulhan se kaho aah itnī na ro.e

be-chārī na be-kār meñ jaan kho.e

arī boTiyāñ tiin sālan meñ tere

ye chhichhḌā likhā thā muqaddar meñ mere

bahut ḳhūb-sūrat bahut nek thā vo

hazāroñ javānoñ meñ bas ek thā vo

dulhan ghar meñ chūran agar hai to laanā

nahīñ to zarā khārī botal mañgānā

na kar bain itne na ro itnā pyārī

hamāre kaleje pe chaltī hai aarī

jamila ab uTTho na aansu bahao

nahin waqt rone ka dariyan bichhao

ye duniya hai fani gaya jaane wala

wo rone se wapas nahin aane wala

na be-kar ab tum duhai machao

uTho apne ghar mein safai karao

muazzaz muazzaz jo aaenge mehman

bahut nak aur bhaun chaDhaengi amman

tum un ke liye jald huqqe mangao

miyan bhag kar chae lipton ki lao

wo sab aa ke izhaar-e-matam karenge

wo baiThak mein roenge chae piyenge

sunaenge marhum ke wo fasane

ki lab bolne ko diye hain KHuda ne

dulhan ne utara na tha surKH joDa

ki dulha ne duniya-e-fani ko chhoDa

bahut KHub-surat bahut nek tha wo

hazaron jawanon mein bas ek tha wo

namaz ek bhi hargiz na us ne qaza ki

shab o roz karta ibaadat KHuda ki

jidhar dekhte hain udhar gham hi gham hai

karen is ka jitna bhi matam wo kam hai

na ro ro ke behaal ho ai dulhan tu

na kar is qadar aah-o-ranj-o-mehan tu

wo jannat mein KHushiyan manaega mat ro

wo huron se ab dil lagaega mat ro

jamila KHuda ki qasam muskura de

teri be-qarari na hum ko rula de

raziyya zara garm chawal to lana

zakiyya zara ThanDa pani pilana

bahut KHub-surat bahut nek tha wo

hazaron jawanon mein bas ek tha wo

jamila mujhe roghni nan dena

wo firni uThana wo pakwan dena

judai mein us ke hua dil diwana

ki lagta hai achchha na pina na khana

mangao polaw zara aur KHala

baDhana zara qorme ka piyala

jidhar dekhte hain udhar gham hi gham hai

karen is ka jitna bhi matam wo kam hai

wo nannhi ke zarde mein kishmish hai thoDi

bahut der se mangti hai nigoDi

wo TukDa jigar ka tha aankhon ka tara

hamein apni aulad se bhi tha pyara

paDa hai polaw mein ghee DalDe ka

KHuda tu hi hafiz hai mere gale ka

dulhan se kaho aah itni na roe

be-chaari na be-kar mein jaan khoe

ari boTiyan tin salan mein tere

ye chhichhDa likha tha muqaddar mein mere

bahut KHub-surat bahut nek tha wo

hazaron jawanon mein bas ek tha wo

dulhan ghar mein churan agar hai to lana

nahin to zara khaari botal mangana

na kar bain itne na ro itna pyari

hamare kaleje pe chalti hai aari