fasad har jagah barpa hai kya kiya jae

fasād har jagah barpā hai kyā kiyā jaa.e

mizāj-e-qaum hī aisā hai kyā kiyā jaa.e

jo maz.habī the masā.il vo ab siyāsī haiñ

yahīñ to daal meñ kaalā hai kyā kiyā jaa.e

udhār piite the ġhālib to ye churātā hai

chachā se aage bhatījā hai kyā kiyā jaa.e

ham apnī naak khujāne se ho ga.e qāsir

hamāre sāmne nakTā hai kyā kiyā jaa.e

hai ḳhud-kushī hī ab anjām ishq-bāzī kā

hamāre ḳhvāb meñ rekhā hai kyā kiyā jaa.e

adū ke ghūñse haiñ to mār-pīT sāloñ kī

yahī to ishq meñ hotā hai kyā kiyā jaa.e

purānā shahr hai badnām qatl-o-ḳhūñ ke liye

magar isī meñ to jiinā hai kyā kiyā jaa.e

har ek sher hamārā hai tanz kā nashtar

hamārā lahja hī tīkhā hai kyā kiyā jaa.e

Dhakā chhupā nahīñ farhād-o-qais kā anjām

'rahīm' aql kā andhā hai kyā kiyā jaa.e

fasad har jagah barpa hai kya kiya jae

mizaj-e-qaum hi aisa hai kya kiya jae

jo mazhabi the masail wo ab siyasi hain

yahin to dal mein kala hai kya kiya jae

udhaar pite the ghaalib to ye churaata hai

chacha se aage bhatija hai kya kiya jae

hum apni nak khujaane se ho gae qasir

hamare samne nakTa hai kya kiya jae

hai KHud-kushi hi ab anjam ishq-bazi ka

hamare KHwab mein rekha hai kya kiya jae

adu ke ghunse hain to mar-piT salon ki

yahi to ishq mein hota hai kya kiya jae

purana shahr hai badnam qatl-o-KHun ke liye

magar isi mein to jina hai kya kiya jae

har ek sher hamara hai tanz ka nashtar

hamara lahja hi tikha hai kya kiya jae

Dhaka chhupa nahin farhad-o-qais ka anjam

'rahim' aql ka andha hai kya kiya jae