haziq-ul-mulk na koi bhi raha mere baad

hāziq-ul-mulk na koī bhī rahā mere ba.ad

kaun degā tujhe khujlī kī davā mere ba.ad

murġhiyāñ kofte machhlī bhune tītar anDe

kis ke ghar jā.egā sailāb-e-ġhizā mere ba.ad

fātiha-ḳhvānī meñ ahbāb uḌā.eñge polāv

aur kareñge mirī baḳhshish kī duā mere ba.ad

ik yahī chiiz hai jo ḳhair se hai be-ration

kaun khā.egā clifton kī havā mere ba.ad

saiñkaḌoñ plan banā kar tujhe dūñgā ai dost

jin ke paḌhne se ho ''bahutoñ kā bhalā'' mere ba.ad

ai ki hai sefety-razor tirā har har ġhamza

aur kis kis pe karegā tū jafā mere ba.ad

kal ye ik uuñT se kahtā thā shuturbān 'majīd'

kaun hogā tire ġhamzoñ pe fidā mere ba.ad

haziq-ul-mulk na koi bhi raha mere baad

kaun dega tujhe khujli ki dawa mere baad

murghiyan kofte machhli bhune titar anDe

kis ke ghar jaega sailab-e-ghiza mere baad

fatiha-KHwani mein ahbab uDaenge polaw

aur karenge meri baKHshish ki dua mere baad

ek yahi chiz hai jo KHair se hai be-ration

kaun khaega clifton ki hawa mere baad

sainkaDon plan bana kar tujhe dunga ai dost

jin ke paDhne se ho bahuton ka bhala mere baad

ai ki hai sefety-razor tera har har ghamza

aur kis kis pe karega tu jafa mere baad

kal ye ek unT se kahta tha shuturban 'majid'

kaun hoga tere ghamzon pe fida mere baad