ham-sai

qayāmat ban ke TuuTī vo kabhī ban kar azaab aa.ī

balā-e-nā-gahānī se nahīñ kam merī ham-sā.ī

vo qaiñchī kī tarah apnī zabāñ jis dam chalātī hai

vo ḳhud-sar ek pal meñ saarā ghar sar par uThātī hai

zabāñ ke saath añgusht-e-shahādat bhī nachātī hai

mujhe jo baat bhī ho yaad fauran bhuul jaatī hai

ye sach hai us ke aage chal nahīñ saktī zabāñ merī

nahīñ minnat-kash-e-tāb-e-shunīdan dāstān merī

mire ghar kā to chaupaT saarā kārobār hai us se

mohalla dard-e-sar kā mustaqil bīmār hai us se

faqat ik maiñ nahīñ saarī galī be-zār hai us se

jise dekho shikār-e-ranjish-e-āzār hai us se

nirālī vaz.a hai saare zamāne se nirālī hai

vo zālim kaun sī bastī kī yā-rab rahne vaalī hai

yahāñ tak silsila pahuñchā hai us kī kam-bayānī kā

vo nau bachchoñ kī maañ hai phir bhī daavā hai javānī kā

vasīla hai yahī ehsās us kī shādmānī kā

bahut kamzor pahlū hai ye us kī zindagānī kā

buā kah kar pukāre jo use sau-sau sunātī hai

vo is pīrāna-sālī meñ bhī baajī kahlavātī hai

gila ḳhvesh-o-aqārib kā hai unvān-e-soḳhan us kā

ḳhusur kī saas kī nandoñ kī ġhībat hai chalan us kā

zabāñ talvār hai us kī dhamākā hai dahan us kā

na kyuuñ ho sab mohalle par musallat makr-o-fan us kā

laḌā.ī meñ na kaam aatī haiñ taqrīreñ na takrāreñ

ki us kī ek aahaT se laraz jaatī haiñ dīvāreñ

mire ghar meñ vo jab aa.ī ba-vaqt-e-ḳhurd-o-nosh aa.ī

takalluf hī ravā rakkhā na jhijkī aur na sharmā.ī

uḌā kar le ga.ī jhaT se mire hisse kī bālā.ī

ye us kī be-hijābī kī hai adnā kār-farmā.ī

vo din mere liye yaum-e-musībat ban ke aayā hai

mirī ammī ne jab us kalamoī ko muñh lagāyā thā

mazā jaatā rahā jiine kā ham-sā.ī milī achchhī

agar guzre to guzre kis tarah ab zindagī achchhī

na us kī dushmanī achchhī na us kī dostī achchhī

kisī ke vāste us kī nahīñ ham-sā.egī achchhī

muqaddar ne bhalā ham se mazāq āḳhir kiyā kyā hai

ḳhudā-yā jis ḳhatā kī ye sazā hai vo ḳhatā kyā hai

qayamat ban ke TuTi wo kabhi ban kar azab aai

bala-e-na-gahani se nahin kam meri ham-sai

wo qainchi ki tarah apni zaban jis dam chalati hai

wo KHud-sar ek pal mein sara ghar sar par uThati hai

zaban ke sath angusht-e-shahadat bhi nachati hai

mujhe jo baat bhi ho yaad fauran bhul jati hai

ye sach hai us ke aage chal nahin sakti zaban meri

nahin minnat-kash-e-tab-e-shunidan dastan meri

mere ghar ka to chaupaT sara karobar hai us se

mohalla dard-e-sar ka mustaqil bimar hai us se

faqat ek main nahin sari gali be-zar hai us se

jise dekho shikar-e-ranjish-e-azar hai us se

nirali waza hai sare zamane se nirali hai

wo zalim kaun si basti ki ya-rab rahne wali hai

yahan tak silsila pahuncha hai us ki kam-bayani ka

wo nau bachchon ki man hai phir bhi dawa hai jawani ka

wasila hai yahi ehsas us ki shadmani ka

bahut kamzor pahlu hai ye us ki zindagani ka

bua kah kar pukare jo use sau-sau sunati hai

wo is pirana-sali mein bhi baji kahlawati hai

gila KHwesh-o-aqarib ka hai unwan-e-soKHan us ka

KHusur ki sas ki nandon ki ghibat hai chalan us ka

zaban talwar hai us ki dhamaka hai dahan us ka

na kyun ho sab mohalle par musallat makr-o-fan us ka

laDai mein na kaam aati hain taqriren na takraren

ki us ki ek aahaT se laraz jati hain diwaren

mere ghar mein wo jab aai ba-waqt-e-KHurd-o-nosh aai

takalluf hi rawa rakkha na jhijki aur na sharmai

uDa kar le gai jhaT se mere hisse ki baalai

ye us ki be-hijabi ki hai adna kar-farmai

wo din mere liye yaum-e-musibat ban ke aaya hai

meri ammi ne jab us kalamoi ko munh lagaya tha

maza jata raha jine ka ham-sai mili achchhi

agar guzre to guzre kis tarah ab zindagi achchhi

na us ki dushmani achchhi na us ki dosti achchhi

kisi ke waste us ki nahin ham-saegi achchhi

muqaddar ne bhala hum se mazaq aaKHir kiya kya hai

KHuda-ya jis KHata ki ye saza hai wo KHata kya hai