حسین چال کی قینچی چلائی جاتی ہے

حسین چال کی قینچی چلائی جاتی ہے

ادا کے ساتھ حجامت بنائی جاتی ہے

جناب شیخ کو دیکھا ہے اس محلے میں

جہاں شراب نظر سے پلائی جاتی ہے

عجیب ڈھنگ سے ہوتی ہے خاطر عاشق

حنائی ہاتھ سے چپل دکھائی جاتی ہے

امیر شہر کے کتوں کے تیز دانتوں سے

غریب شہر کی ہڈی چبائی جاتی ہے

مرے دیار کا دھوبی جہاں بھی جاتا ہے

اسے گدھوں کی کہانی سنائی جاتی ہے

بہ وقت صبح مجھے سیلری کے دن گھر میں

بنا کے چائے ادا سے پلائی جاتی ہے

نرالا ڈھنگ ہے چوری کا ان کی بستی میں

نظر سے ہوش کی پونجی چرائی جاتی ہے

پٹائی ہوتی ہے اس شخص کی سر محفل

جسے ادائے تبسم دکھائی جاتی ہے