holi

chhā.ī haiñ har ik samt jo holī kī bahāreñ

pichkāriyāñ taane vo hasīnoñ kī qatāreñ

haiñ haath hinā-rañg to rañgīn phuvāreñ

ik dil se bhalā aartī kis kis kī utāreñ

chandan se badan āb-e-gul-e-shoḳh se nam haiñ

sau dil hoñ agar paas to is bazm meñ kam haiñ

mehrāb-e-dar-e-mai-kadā har ābrū-e-ḳhamdār

bal khāne se shoḳhī meñ bane jaate haiñ talvār

kahtā hai har ik dil ki fidā-e-lab-o-ruḳhsār

sab ishq ke saudā.ī haiñ ma.ashūq ḳharīdār

sūraj bhī parastār hai biñdiyā kī chamak kā

har zaḳhm maza letā hai chehre ke namak kā

rañgīn phuvāreñ haiñ ki sāvan kī jhaḌī hai

būñdoñ ke nagīnoñ ne har ik shakl jaḌī hai

chillāte haiñ āshiq ki musībat kī ghaḌī hai

vo shoḳh liye rañg jo hāthoñ meñ khaḌī hai

taskīn milegī jo gale aan lagegī

paanī ke bujhā.e se na ye aag bujhegī

tasvīr banī jaatī hai ik nāz-o-adā se

paanī huī jaatī hai koī sharm-o-hayā se

resham sī laTeñ ruḳh pe ulajhtī haiñ havā se

buDDhe bhī duā karte haiñ jiine kī ḳhudā se

ma.ashūq koī rañg jo chehre pe lagā de

ham kyā haiñ farishte ko bhī insān banā de

haiñ gandumī chehre to badan sab ke hare haiñ

rañgīn phuvāroñ se chaman dil ke bhare haiñ

us dil ko hī dil kahiye qadam jis pe dhare haiñ

dil pāñv-tale shoḳh jo pāmāl kare haiñ

hai jashn-e-bahārāñ to chalo holī manā.eñ

is rañg ke sailāb meñ sab mil ke nahā.eñ

nafrat ke taraf-dār nahīñ sāhib-e-irfāñ

dete haiñ sabaq pyaar ke giitā ho ki qur.āñ

tyauhār to tyauhār hai hindū na musalmāñ

ham rañg uchhaleñ to pakā.eñ vo sivayyāñ

ranjīda paḌosī jo uThā dār-e-jahāñ se

ḳhushiyoñ kā guzar hogā na phir tere makāñ se

chhai hain har ek samt jo holi ki bahaaren

pichkariyan tane wo hasinon ki qataren

hain hath hina-rang to rangin phuwaren

ek dil se bhala aarti kis kis ki utaren

chandan se badan aab-e-gul-e-shoKH se nam hain

sau dil hon agar pas to is bazm mein kam hain

mehrab-e-dar-e-mai-kada har aabru-e-KHamdar

bal khane se shoKHi mein bane jate hain talwar

kahta hai har ek dil ki fida-e-lab-o-ruKHsar

sab ishq ke saudai hain mashuq KHaridar

suraj bhi parastar hai bindiya ki chamak ka

har zaKHm maza leta hai chehre ke namak ka

rangin phuwaren hain ki sawan ki jhaDi hai

bundon ke naginon ne har ek shakl jaDi hai

chillate hain aashiq ki musibat ki ghaDi hai

wo shoKH liye rang jo hathon mein khaDi hai

taskin milegi jo gale aan lagegi

pani ke bujhae se na ye aag bujhegi

taswir bani jati hai ek naz-o-ada se

pani hui jati hai koi sharm-o-haya se

resham si laTen ruKH pe ulajhti hain hawa se

buDDhe bhi dua karte hain jine ki KHuda se

mashuq koi rang jo chehre pe laga de

hum kya hain farishte ko bhi insan bana de

hain gandumi chehre to badan sab ke hare hain

rangin phuwaron se chaman dil ke bhare hain

us dil ko hi dil kahiye qadam jis pe dhare hain

dil panw-tale shoKH jo pamal kare hain

hai jashn-e-bahaaran to chalo holi manaen

is rang ke sailab mein sab mil ke nahaen

nafrat ke taraf-dar nahin sahib-e-irfan

dete hain sabaq pyar ke gita ho ki quran

tyauhaar to tyauhaar hai hindu na musalman

hum rang uchhalen to pakaen wo siwayyan

ranjida paDosi jo uTha dar-e-jahan se

KHushiyon ka guzar hoga na phir tere makan se