ajnabi chaman mein

na banā sakā nasheman kisī ajnabī chaman meñ

mirā ghar jalā hai jab se mire apne hī vatan meñ

mire zauq-e-ḳhush-libāsī ko farishte bhī to dekheñ

maiñ marūñ to dafn karnā Terī-len ke kafan meñ

ye hai be-sabāt duniyā isī dam ke murġh kī sī

jo sub.h pakā kitchen meñ magar aayā na tiffin meñ

maza gul ke toḌne kā to milā bahut ai gulchīñ

milī lazzat-e-ḳhalish bhī kisī ḳhaar kī chubhan meñ

yahī aarzū hai merī nazm-o-nasr meñ yaksāñ

ki nahīñ tazād koī mere sher aur suḳhan meñ

kabhī sābiqa paḌe na mirā saas aur ḳhusar se

mile biivī gaay jaisī jo bañdhī rahe sahn meñ

maiñ kabhī na byaah kartā jo mujhe ye ilm hotā

ki hajm baḌhegā un kā to ghaTūñgā maiñ vazan meñ

chaḌhā un pe gosht kaise mirī niklī haDDiyāñ kyoñ

ye to raaz kī haiñ bāteñ kahūñ kaise anjuman meñ

yahī farq rah gayā hai ai raqīb tujh meñ mujh meñ

maiñ basā huuñ jā ke bamba.ī tū rahā nahīñ dakan meñ

vahāñ byaah maiñ rachāyā tū rahā yahāñ akelā

maiñ qafas meñ bhī huuñ āzād tū asiir hai chaman meñ

ye hamārā hī vatan hai magar aaj ham haiñ mehmāñ

hai ajab sitam-zarīfī ki haiñ be-vatan vatan meñ

koī 'ḳhvāh-maḳhvāh' pūchhe tire qurb kī latāfat

ki tirā ḳhayāl aayā huī gudgudī badan meñ

na bana saka nasheman kisi ajnabi chaman mein

mera ghar jala hai jab se mere apne hi watan mein

mere zauq-e-KHush-libasi ko farishte bhi to dekhen

main marun to dafn karna Teri-len ke kafan mein

ye hai be-sabaat duniya isi dam ke murgh ki si

jo subh paka kitchen mein magar aaya na tiffin mein

maza gul ke toDne ka to mila bahut ai gulchin

mili lazzat-e-KHalish bhi kisi KHar ki chubhan mein

yahi aarzu hai meri nazm-o-nasr mein yaksan

ki nahin tazad koi mere sher aur suKHan mein

kabhi sabiqa paDe na mera sas aur KHusar se

mile biwi gay jaisi jo bandhi rahe sahn mein

main kabhi na byah karta jo mujhe ye ilm hota

ki hajm baDhega un ka to ghaTunga main wazan mein

chaDha un pe gosht kaise meri nikli haDDiyan kyon

ye to raaz ki hain baaten kahun kaise anjuman mein

yahi farq rah gaya hai ai raqib tujh mein mujh mein

main basa hun ja ke bambai tu raha nahin dakan mein

wahan byah main rachaya tu raha yahan akela

main qafas mein bhi hun aazad tu asir hai chaman mein

ye hamara hi watan hai magar aaj hum hain mehman

hai ajab sitam-zarifi ki hain be-watan watan mein

koi 'KHwah-maKHwah' puchhe tere qurb ki latafat

ki tera KHayal aaya hui gudgudi badan mein