biwi aur patlun

begam se kahā ham ne jo fursat hai aap ko

patlūn meñ hamārī baTan ek Taañk do

ġhusse se bolīñ aap hī ḳhud Taañk leñ janāb

biivī kā jab mazāq uḌāte rahe haiñ aap

biivī baġhair aadmī hote nahīñ puure

maiñ na rahūñ to aap bhī rah jaa.eñ adhūre

yuuñ to baTan kā Tañknā chhoTā sā kaam hai

ye kaam bhī to lā.eq-e-sad-ehtirām hai

mardāngī kī shaan na itnī baghāriye

suuī meñ sirf dhāgā piro kar dikhā.e

patlūn meñ jo aap baTan ḳhud lagā.eñge

uñglī chubho ke suuī meñ ḳhuuñ meñ nahā.eñge

socho baTan baġhair jo patlūn pahante

patlūn phisaltī to kyā sab log na hañste

patlūn meñ tumhārī baTan kaun Tāñktī

duniyā meñ tum batāo jo aurat hī na hotī

ham ne kahā ki apnī baḌā.ī na hāñkiye

chhoTī sī hai ye baat na aage baḌhā.iye

patlūn meñ bas ek baTan Tāñkne kā thā

patlūn ko baTan meñ nahīñ Tāñkne kā thā

ġhusse ko thuuk diije merī baat māniye

khaa.ī meñ yuuñ bahas kī ḳhudārā na jhāñkiye

gar is bahas kā ḳhātma honā zarūr hai

jo baat sach hai aap ko sunñā zarūr hai

aurat agar na hotī to jannat hī meñ rahte

duniyā meñ aa ke is tarah dukh-dard na sahte

shādī byaah kā hameñ ḳhatra bhī na hotā

sirf ik baTan ko Tāñkne kā naḳhra bhī na hotā

biivī yā us kī bahan ho yā ho kisī kī saas

tum ho isī liye to pahante haiñ ham libās

mardoñ ko agar duniyā meñ aurat hī na hotī

patlūn pahanñe kī zarūrat hī na hotī

begam se kaha hum ne jo fursat hai aap ko

patlun mein hamari baTan ek Tank do

ghusse se bolin aap hi KHud Tank len janab

biwi ka jab mazaq uDate rahe hain aap

biwi baghair aadmi hote nahin pure

main na rahun to aap bhi rah jaen adhure

yun to baTan ka Tankna chhoTa sa kaam hai

ye kaam bhi to laeq-e-sad-ehtiram hai

mardangi ki shan na itni baghaariye

sui mein sirf dhaga piro kar dikhae

patlun mein jo aap baTan KHud lagaenge

ungli chubho ke sui mein KHun mein nahaenge

socho baTan baghair jo patlun pahante

patlun phisalti to kya sab log na hanste

patlun mein tumhaari baTan kaun Tankti

duniya mein tum batao jo aurat hi na hoti

hum ne kaha ki apni baDai na hankiye

chhoTi si hai ye baat na aage baDhaiye

patlun mein bas ek baTan Tankne ka tha

patlun ko baTan mein nahin Tankne ka tha

ghusse ko thuk dije meri baat maniye

khai mein yun bahas ki KHudara na jhankiye

gar is bahas ka KHatma hona zarur hai

jo baat sach hai aap ko sunna zarur hai

aurat agar na hoti to jannat hi mein rahte

duniya mein aa ke is tarah dukh-dard na sahte

shadi byah ka hamein KHatra bhi na hota

sirf ek baTan ko Tankne ka naKHra bhi na hota

biwi ya us ki bahan ho ya ho kisi ki sas

tum ho isi liye to pahante hain hum libas

mardon ko agar duniya mein aurat hi na hoti

patlun pahanne ki zarurat hi na hoti