dekhte jao

kisī kī Dhal ga.ī kaisī javānī dekhte jaao

jo thiiñ begam vo haiñ bachchoñ kī naanī dekhte jaao

Tañgī hai jo mire hanger-numā kandhoñ pe mailī sī

mirī shādī kī hai ye shervānī dekhte jaao

dikhā ke dasveñ nau-maulūd ko mujh se vo ye bolīñ

mohabbat kī hai ye taaza nishānī dekhte jaao

kiyā begam ne nāfiz ghar meñ dastūr-e-zabāñ-bandī

mire ghar aao merī be-zabānī dekhte jaao

maiñ pachpan kā huuñ vo pañdrah baras se tiis ke hī haiñ

javānī un kī merī nā-tavānī dekhte jaao

khaḌe haiñ sāmne ā.īne ke aur muskurāte haiñ

javānī ho ga.ī kaisī divānī dekhte jaao

bujhā saktā na thā jo tishnagī sahrā kī vo bādal

hayā se ho gayā hai paanī paanī dekhte jaao

bahut majbūr hotā hai to insāñ ḳhuun piitā hai

garāñ hai kis qadar piine kā paanī dekhte jaao

hamārā ḳhuun ik-na-ik din lā kar rahegā rañg

tumheñ mahñgī paḌegī zindagānī dekhte jaao

lahū par be-gunāhoñ ke rakhī hoñ jis kī buniyādeñ

nahīñ chalne kī aisī hukmarānī dekhte jaao

hayā aur sharm uThtī jā rahī hai is zamāne se

na jaane kab mire āñkhoñ kā paanī dekhte jaao

javānī 'ḳhvāh-maḳhvāh' ke dil kī kuchh to gul khilā.egī

hasīnoñ se chalī hai chheḌ-ḳhāni dekhte jaao

kisi ki Dhal gai kaisi jawani dekhte jao

jo thin begam wo hain bachchon ki nani dekhte jao

Tangi hai jo mere hanger-numa kandhon pe maili si

meri shadi ki hai ye sherwani dekhte jao

dikha ke daswen nau-maulud ko mujh se wo ye bolin

mohabbat ki hai ye taza nishani dekhte jao

kiya begam ne nafiz ghar mein dastur-e-zaban-bandi

mere ghar aao meri be-zabani dekhte jao

main pachpan ka hun wo pandrah baras se tis ke hi hain

jawani un ki meri na-tawani dekhte jao

khaDe hain samne aaine ke aur muskuraate hain

jawani ho gai kaisi diwani dekhte jao

bujha sakta na tha jo tishnagi sahra ki wo baadal

haya se ho gaya hai pani pani dekhte jao

bahut majbur hota hai to insan KHun pita hai

garan hai kis qadar pine ka pani dekhte jao

hamara KHun ik-na-ik din la kar rahega rang

tumhein mahngi paDegi zindagani dekhte jao

lahu par be-gunahon ke rakhi hon jis ki buniyaaden

nahin chalne ki aisi hukmarani dekhte jao

haya aur sharm uThti ja rahi hai is zamane se

na jaane kab mere aankhon ka pani dekhte jao

jawani 'KHwah-maKHwah' ke dil ki kuchh to gul khilaegi

hasinon se chali hai chheD-KHani dekhte jao