meri jaanib wo Khaalis shorba sarkae jate hain

mirī jānib vo ḳhālis shorbā sarkā.e jaate haiñ

magar ḳhud murġh par apnā karam farmā.e jaate haiñ

kahā thā doctor ne bach ke rahnā ḳhush-ḳhurākī se

magar tauba vo baiThe haiñ to ab tak khaa.e jaate haiñ

chale aao mulāqātoñ kī garmī saath meñ le kar

kahāñ ho tum yahāñ ham june meñ ThanDā.e jaate haiñ

unhīñ se ho gayā rishta hamārā Thiik hai lekin

na jaane phir bhī kyoñ chakkar pe chakkar aa.e jaate haiñ

saḌak par aate jaate sab unheñ pahchān lete the

na ab māshūq hī vaise na āshiq paa.e jaate haiñ

bharosa hai vafādārī pe un kī kah diyā phir bhī

qasam vo haath mere sar pe rakh kar khaa.e jaate haiñ

javānī un ko ghar meñ chain se rahne nahīñ detī

miyāñ 'masrūr' hī mujrim magar Thahrā.e jaate haiñ

meri jaanib wo KHalis shorba sarkae jate hain

magar KHud murgh par apna karam farmae jate hain

kaha tha doctor ne bach ke rahna KHush-KHuraki se

magar tauba wo baiThe hain to ab tak khae jate hain

chale aao mulaqaton ki garmi sath mein le kar

kahan ho tum yahan hum june mein ThanDae jate hain

unhin se ho gaya rishta hamara Thik hai lekin

na jaane phir bhi kyon chakkar pe chakkar aae jate hain

saDak par aate jate sab unhen pahchan lete the

na ab mashuq hi waise na aashiq pae jate hain

bharosa hai wafadari pe un ki kah diya phir bhi

qasam wo hath mere sar pe rakh kar khae jate hain

jawani un ko ghar mein chain se rahne nahin deti

miyan 'masrur' hi mujrim magar Thahrae jate hain