tanziya ghazal

shā.irī meñ na kabhī shikva-e-rusvā.ī kar

apne ash.ār kī tū ḳhud hī pazīrā.ī kar

tere vīrān shab-o-roz bhī rañgīñ hoñge

bas kisī tarah hasīnoñ se shanāsā.ī kar

jo marīzān-e-mohabbat haiñ ġhamoñ ke maare

un kī ash.ār-e-zarāfat se masīhā.ī kar

peT kī aag bujhā mehnat-o-mazdūrī se

vaqt bach jaa.e to mashq-e-suḳhan-ārā.ī kar

bhuul kar ishq kā saudā na samā le sar meñ

aur majnūñ kī tarah ḳhud ko na saudā.ī kar

apnī tanhā.iyāñ yādoñ se daraḳhshāñ kar le

phir tasavvur meñ sahī anjuman-ārā.ī kar

ājizī aur na aañsū na fuġhāñ shāmil hai

kuchh to fariyād ko tū qābil-e-shanvā.ī kar

vaqt ke saath tirā dil bhī bahal jā.egā

le ke kāġhaz-o-qalam qāfiya-paimā.ī kar

apne māshūq ke ḳhvāboñ meñ chalā jā har shab

'ḳhvāh-maḳhvāh' yuuñ bhī ilāj-e-ġham-e-tanhā.ī kar

aur agar chāhe ki ho 'ḳhvāh-maḳhvāh' shohrat terī

yūsufī gar nahīñ mumkin to zuleḳhā.ī kar

shairi mein na kabhi shikwa-e-ruswai kar

apne ashaar ki tu KHud hi pazirai kar

tere viran shab-o-roz bhi rangin honge

bas kisi tarah hasinon se shanasai kar

jo marizan-e-mohabbat hain ghamon ke mare

un ki ashaar-e-zarafat se masihai kar

peT ki aag bujha mehnat-o-mazduri se

waqt bach jae to mashq-e-suKHan-arai kar

bhul kar ishq ka sauda na sama le sar mein

aur majnun ki tarah KHud ko na saudai kar

apni tanhaiyan yaadon se daraKHshan kar le

phir tasawwur mein sahi anjuman-arai kar

aajizi aur na aansu na fughan shamil hai

kuchh to fariyaad ko tu qabil-e-shanwai kar

waqt ke sath tera dil bhi bahal jaega

le ke kaghaz-o-qalam qafiya-paimai kar

apne mashuq ke KHwabon mein chala ja har shab

'KHwah-maKHwah' yun bhi ilaj-e-gham-e-tanhai kar

aur agar chahe ki ho 'KHwah-maKHwah' shohrat teri

yusufi gar nahin mumkin to zuleKHai kar