is se pahle ki ghar ke pardon se

is se pahle ki ghar ke pardoñ se

Teddy-patlūn koī silvā luuñ

is se pahle ki tujh ko de kar dil

tere kūche meñ ḳhud ko piTvā luuñ

is se pahle ki terī furqat meñ

ḳhud-kashī kī scheme apnā luuñ

is se pahle ki ik tirī ḳhātir

naam ġhunDoñ meñ apnā likhvā luuñ

maiñ tirā shahr chhoḌ jā.ūñgā

is se pahle ki vo udū kam-baḳht

tere ghar jā ke chuġhliyāñ khaa.e

is se pahle ki deñ rapaT jā kar

tere mere sharīf ham-sā.e

is se pahle ki terī farmā.ish

mujh se chorī kā jurm karvā.e

is se pahle ki apnā thānedār

murġhā thāne meñ mujh ko banvā.e

maiñ tirā shahr chhoḌ jā.ūñgā

tujh ko āgāh kyuuñ na kar duuñ maiñ

apne is intizām se pahle

mashvara bhī tujhī se karnā hai

apnī marg-e-harām se pahle

koī aisī train batlā de

jaa.e jo tez-gām se pahle

aaj ke is dinner ko bhugtā kar

kal kisī vaqt shaam se pahle

maiñ tirā shahr chhoḌ jā.ūñgā

dil kī gardan maroḌ jā.ūñgā

is se pahle ki ghar ke pardon se

Teddy-patlun koi silwa lun

is se pahle ki tujh ko de kar dil

tere kuche mein KHud ko piTwa lun

is se pahle ki teri furqat mein

KHud-kashi ki scheme apna lun

is se pahle ki ek teri KHatir

nam ghunDon mein apna likhwa lun

main tera shahr chhoD jaunga

is se pahle ki wo udu kam-baKHt

tere ghar ja ke chughliyan khae

is se pahle ki den rapaT ja kar

tere mere sharif ham-sae

is se pahle ki teri farmaish

mujh se chori ka jurm karwae

is se pahle ki apna thanedar

murgha thane mein mujh ko banwae

main tera shahr chhoD jaunga

tujh ko aagah kyun na kar dun main

apne is intizam se pahle

mashwara bhi tujhi se karna hai

apni marg-e-haram se pahle

koi aisi train batla de

jae jo tez-gam se pahle

aaj ke is dinner ko bhugta kar

kal kisi waqt sham se pahle

main tera shahr chhoD jaunga

dil ki gardan maroD jaunga