layal-pur ke machchhar

ye lāyal-pūr ke machchhar jo mil vāloñ ne paale haiñ

bahādur sūrmā sāvañt tagḌe aur jiyāle haiñ

munazzam taur se mehmāñ pe shab-ḳhūñ mārne vaale

ye vo haiñ jo nahīñ kaunain se bhī hārne vaale

filaT chhiḌke hue kamroñ meñ bhī tan-tan ke aate haiñ

vo sab mil kar ḳhushī meñ fat.h ke baaje bajāte the

kabhī vo chārpā.ī par kabhī vo farsh par baiThe

dimāġh ūñchā havā itnā ki uḌ kar 'arsh' par baiThe

kisī machchhar ne baḌh kar hazrat-e-'maḳhmūr' ko kaaTā

ḳhumār utrā to chhāyā ālam-e-hastī meñ sannāTā

kabhī rāġhib se raġhbat kī kabhī sāhil pe aa baiThe

savāb-e-haj kī ḳhātir maulvī 'māhir' pe jā baiThe

kabhī 'āzād' ko chakkhā kabhī 'ehsān' ko chāTā

sitam ye hai ki mujh se sāhib-e-īmān ko kaaTā

miyāñ-sayyad-mohamād-jāfarī kī ġhair hālat thī

jo muñh kholā ghuse muñh meñ lihāf oḌhā to shāmat thī

kahā 'aḳhtar' se panDit-jī hamārā bhī bhajan sun lo

bahut hī muḳhtasar hai qissa-e-dār-o-rasan sun lo

bahut tañg aa ga.e jab machchharoñ kī Dañk-mārī se

to sab shā.er taḌap uTThe nihāyat be-qarārī se

kametī kar ke aapas meñ yahī ik baat tai paa.ī

javābī hamla un par ho ba-sad sabr-o-shakebā.ī

bahut hushyār hokar an se laḌne kī jo baaī hai

kahīñ sab shā.iroñ aur machchharoñ kī jañg jaarī hai

kabhī taalī bajāte the kabhī vo sar khujāte the

vo ghabrāhaT meñ mil kar ek hī misra ye gaate the

zarā sī jaan kī chañgez-ḳhānī dekhte jaao

ab uTThā chāhtī hai lāsh-e-'fānī' dekhte jaao

ye layal-pur ke machchhar jo mil walon ne pale hain

bahadur surma sawant tagDe aur jiyale hain

munazzam taur se mehman pe shab-KHun marne wale

ye wo hain jo nahin kaunain se bhi haarne wale

filaT chhiDke hue kamron mein bhi tan-tan ke aate hain

wo sab mil kar KHushi mein fath ke baje bajate the

kabhi wo chaarpai par kabhi wo farsh par baiThe

dimagh uncha hawa itna ki uD kar 'arsh' par baiThe

kisi machchhar ne baDh kar hazrat-e-'maKHmur' ko kaTa

KHumar utra to chhaya aalam-e-hasti mein sannaTa

kabhi raghib se raghbat ki kabhi sahil pe aa baiThe

sawab-e-haj ki KHatir maulwi 'mahir' pe ja baiThe

kabhi 'azad' ko chakkha kabhi 'ehsan' ko chaTa

sitam ye hai ki mujh se sahib-e-iman ko kaTa

miyan-sayyad-mohamad-jafari ki ghair haalat thi

jo munh khola ghuse munh mein lihaf oDha to shamat thi

kaha 'aKHtar' se panDit-ji hamara bhi bhajan sun lo

bahut hi muKHtasar hai qissa-e-dar-o-rasan sun lo

bahut tang aa gae jab machchharon ki Dank-mari se

to sab shaer taDap uTThe nihayat be-qarari se

kameti kar ke aapas mein yahi ek baat tai pai

jawabi hamla un par ho ba-sad sabr-o-shakebai

bahut hushyar hokar an se laDne ki jo bai hai

kahin sab shairon aur machchharon ki jang jari hai

kabhi tali bajate the kabhi wo sar khujate the

wo ghabrahaT mein mil kar ek hi misra ye gate the

zara si jaan ki changez-KHani dekhte jao

ab uTTha chahti hai lash-e-'fani' dekhte jao