maqsad-e-hayat

zindagī apnī numā.ish-gāh-e-masnūāt hai

chaar din bijlī ke lamp aur phir añdherī raat hai

aa.e haiñ duniyā meñ koī kaam karne ke liye

kuchh ḳhudā se aur kuchh biivī se Darne ke liye

hai javānoñ ke liye cinema meñ jaanā zindagī

jeb meñ paa.ī na ho tie lagānā zindagī

mah-vashoñ se baaġh meñ āñkheñ laḌānā zindagī

ġhusl-ḳhāne meñ akele gungunānā zindagī

ishq-bāzī aur mausīqī nahīñ to kuchh nahīñ

aur kuchh kuchh mai se dilchaspī nahīñ to kuchh nahīñ

sher kahnā bhī banā jaatā hai juzv-e-zindagī

naam chhap jaanā risāle meñ hai hadd-e-shā.irī

nasr meñ ash.ār kah lenā hai ik san.at na.ī

aur agar ye bhī nahīñ ḳhālī taḳhallus hī sahī

naam ke saath ek do alfāz kī dum chāhiye

sher phīkā hī sahī lekin tarannum chāhiye

zindagī kā ek maqsad leaderī karnā bhī hai

chanda khā kar qaum kī ulfat kā dam bharnā bhī hai

mulk par jaañ denā lafzī taur par marnā bhī hai

is pe murda-bād ke nāroñ se kuchh Darnā bhī hai

ban ke leader so rahe to zindagī kis kaam kī

amn qaa.em ho gayā to leaderī kis kaam kī

maqsad-e-hajjām hai aurat banānā mard se

maqsad apnā hai Darānā but ko āh-e-sard se

zindagī ke aur maqsad bhī haiñ insāñ ke liye

koī aivāñ ke liye hai koī zindāñ ke liye

koī gulshan ke liye koī bayābāñ ke liye

aur ye 'laqlaq' hai to afkār-e-pareshāñ ke liye

raat din is kā qalam masrūf-e-laqlaqyāt hai

chaar din kī chāñdnī hai phir añdherī raat hai

zindagi apni numaish-gah-e-masnuat hai

chaar din bijli ke lamp aur phir andheri raat hai

aae hain duniya mein koi kaam karne ke liye

kuchh KHuda se aur kuchh biwi se Darne ke liye

hai jawanon ke liye cinema mein jaana zindagi

jeb mein pai na ho tie lagana zindagi

mah-washon se bagh mein aankhen laDana zindagi

ghusl-KHane mein akele gungunana zindagi

ishq-bazi aur mausiqi nahin to kuchh nahin

aur kuchh kuchh mai se dilchaspi nahin to kuchh nahin

sher kahna bhi bana jata hai juzw-e-zindagi

nam chhap jaana risale mein hai hadd-e-shairi

nasr mein ashaar kah lena hai ek sanat nai

aur agar ye bhi nahin KHali taKHallus hi sahi

nam ke sath ek do alfaz ki dum chahiye

sher phika hi sahi lekin tarannum chahiye

zindagi ka ek maqsad leaderi karna bhi hai

chanda kha kar qaum ki ulfat ka dam bharna bhi hai

mulk par jaan dena lafzi taur par marna bhi hai

is pe murda-baad ke naron se kuchh Darna bhi hai

ban ke leader so rahe to zindagi kis kaam ki

amn qaem ho gaya to leaderi kis kaam ki

maqsad-e-hajjam hai aurat banana mard se

maqsad apna hai Darana but ko aah-e-sard se

zindagi ke aur maqsad bhi hain insan ke liye

koi aiwan ke liye hai koi zindan ke liye

koi gulshan ke liye koi bayaban ke liye

aur ye 'laqlaq' hai to afkar-e-pareshan ke liye

raat din is ka qalam masruf-e-laqlaqyat hai

chaar din ki chandni hai phir andheri raat hai