mardum-gazida insan ka ilaj

bahut dinoñ meñ koī kaam kī ḳhabar aa.ī

kahīñ to shahr meñ insāniyat nazar aa.ī

baḌā vasī.a ḳhalā is ḳhabar ne paaTā hai

ki aadmī ne kisī aadmī ko kaaTā hai

ga.e vo din ki jab insān sag-gazīda thā

lahū lahū thā badan pairahan darīda thā

hamāre daur meñ zālim sitam-rasīda hai

ki aadmī hī yahāñ ādmī-gazīda hai

ajiib daur hai kuttā to rahm khātā hai

aur aadmī se jo bolo to kaaTe khātā hai

gazīdgī jo ab insān kī sifāt meñ hai

ye kāT-kūT har ik shobā-e-hayāt meñ hai

na koī dost na hamdam na āshnā na habīb

usī se ḳhauf ziyāda jo hai ziyāda qarīb

safar meñ log chaleñge jo saath kāTeñge

musāfaha ho to hāthoñ ko haath kāTeñge

safar meñ jeb-e-musāfir ko kaaTā jā.egā

mushā.ere ho to shā.er ko kaaTā jā.egā

na khul ke haath chaleñge na fighting hogā

mileñge log jahāñ back-biting hogā

na actor na musavvir na writer niklā

jise bhī dost kahā back-biter niklā

chalī hai rasm ki ik dūsre kī kaaT karo

badī ke naam diloñ ke makāñ allot karo

jalegā aisī hī ḳhabroñ se ab nazar kā diyā

ki aadmī ne kisī aadmī ko kaaT liyā

purāne Tīkoñ kā ab kyā asar ho āñtoñ meñ

khulā ki zahr hai ab aadmī ke dāñtoñ meñ

jo zaḳhm sag se milā thā vo surgery se silā

vo zaḳhm kaise bharegā jo aadmī se milā?

abhī to kuchh bhī nahīñ apnī had meñ hai har baat

abhī ḳharāb nahīñ haiñ samāj ke hālāt

abhī to aadmī bhoñkā hai ibn-e-ādam par

abhī azaab koī aur aa.egā ham par

junūñ ye aur baḌhegā to rañg lā.egā

ye aadmī kabhī kutte ko kaaT khā.egā

bahut dinon mein koi kaam ki KHabar aai

kahin to shahr mein insaniyat nazar aai

baDa wasia KHala is KHabar ne paTa hai

ki aadmi ne kisi aadmi ko kaTa hai

gae wo din ki jab insan sag-gazida tha

lahu lahu tha badan pairahan darida tha

hamare daur mein zalim sitam-rasida hai

ki aadmi hi yahan aadmi-gazida hai

ajib daur hai kutta to rahm khata hai

aur aadmi se jo bolo to kaTe khata hai

gazidgi jo ab insan ki sifat mein hai

ye kaT-kuT har ek shoba-e-hayat mein hai

na koi dost na hamdam na aashna na habib

usi se KHauf ziyaada jo hai ziyaada qarib

safar mein log chalenge jo sath kaTenge

musafaha ho to hathon ko hath kaTenge

safar mein jeb-e-musafir ko kaTa jaega

mushaere ho to shaer ko kaTa jaega

na khul ke hath chalenge na fighting hoga

milenge log jahan back-biting hoga

na actor na musawwir na writer nikla

jise bhi dost kaha back-biter nikla

chali hai rasm ki ek dusre ki kaT karo

badi ke nam dilon ke makan allot karo

jalega aisi hi KHabron se ab nazar ka diya

ki aadmi ne kisi aadmi ko kaT liya

purane Tikon ka ab kya asar ho aanton mein

khula ki zahr hai ab aadmi ke danton mein

jo zaKHm sag se mila tha wo surgery se sila

wo zaKHm kaise bharega jo aadmi se mila?

abhi to kuchh bhi nahin apni had mein hai har baat

abhi KHarab nahin hain samaj ke haalat

abhi to aadmi bhonka hai ibn-e-adam par

abhi azab koi aur aaega hum par

junun ye aur baDhega to rang laega

ye aadmi kabhi kutte ko kaT khaega