medical test

do mulāzim ek kaalā aur gorā dūsrā

dūsrā paidal magar pahlā savār-e-rāh-vār

the civil-surgeon kī koThī kī taraf donoñ ravāñ

kyūñki bīmārī kī ruḳhsat ke the donoñ ḳhvāst-gār

raah meñ donoñ ke bāham ho ga.ī kuchh hasht-masht

kokh meñ kaale kī ik mukkā diyā gore ne maar

sadma pahuñchā jis se tillī ko bahut miskīn kī

aa ke ghoḌe se liyā sā.īs ne us ko utaar

Thok kar kaale ko gore ne to apnī raah lī

choT ke sadme se ġhash kaale ko aayā chand-bār

āḳhirash koThī pe pahuñche jā ke donoñ pesh-o-pas

zārib apne paañv aur mazrūb Dolī meñ savār

doctor ne aa ke donoñ kī sunī jab sarguzisht

tah ko jā pahuñchā suḳhan kī sun ke qissa ek-bār

dī sanad gore ko likh kar jis meñ thī tasdīq-e-marz

aur ye likkhā thā masā.il haiñ bahut zār-o-nizār

yaanī ik kaalā na jis gore ke mukke se mare

kar nahīñ saktā hukūmat hind par vo zīnhār

aur kahā kaale se tum ko mil nahīñ saktī sanad

kyūñki tum mālūm hote ho ba-zāhir jān-dār

ek kaalā piT ke jo gore se fauran mar na jaa.e

aa.e baabā us kī bīmārī kā kyūñkar e'tibār

do mulazim ek kala aur gora dusra

dusra paidal magar pahla sawar-e-rah-war

the ciwil-surgeon ki koThi ki taraf donon rawan

kyunki bimari ki ruKHsat ke the donon KHwast-gar

rah mein donon ke baham ho gai kuchh hasht-masht

kokh mein kale ki ek mukka diya gore ne mar

sadma pahuncha jis se tilli ko bahut miskin ki

aa ke ghoDe se liya sais ne us ko utar

Thok kar kale ko gore ne to apni rah li

choT ke sadme se ghash kale ko aaya chand-bar

aaKHirash koThi pe pahunche ja ke donon pesh-o-pas

zarib apne panw aur mazrub Doli mein sawar

doctor ne aa ke donon ki suni jab sarguzisht

tah ko ja pahuncha suKHan ki sun ke qissa ek-bar

di sanad gore ko likh kar jis mein thi tasdiq-e-marz

aur ye likkha tha masail hain bahut zar-o-nizar

yani ek kala na jis gore ke mukke se mare

kar nahin sakta hukumat hind par wo zinhaar

aur kaha kale se tum ko mil nahin sakti sanad

kyunki tum malum hote ho ba-zahir jaan-dar

ek kala piT ke jo gore se fauran mar na jae

aae baba us ki bimari ka kyunkar e'tibar