miss simin badan

ek mis sīmīñ badan se kar liyā london meñ aqd

is ḳhatā par sun rahā huuñ tāna-hā-e-dil-ḳharāsh

koī kahtā hai ki bas us ne bigāḌī nasl-e-qaum

koī kahtā hai ki ye hai bad-ḳhisāl-o-bad-ma.āsh

dil meñ kuchh insāf kartā hī nahīñ koī buzurg

ho ke ab majbūr ḳhud is raaz ko kartā huuñ faash

hotī thī tākīd london jaao añgrezī paḌho

qaum-e-english se milo sīkho vahī vaz.a-e-tarāsh

jagmagāte hoTaloñ kā jā ke nazzāra karo

soup o karrī ke maze lo chhoḌ kar yaḳhnī o aash

līdaroñ se mil ke dekho un ke andāz-o-tarīq

hall meñ nācho clab meñ jaake khelo un se taash

bāda-e-tahzīb-e-europe ke chaḌhāo ḳhum ke ḳhum

asia ke shīsha-e-taqvā ko kar do paash paash

jab amal is par kiyā pariyoñ kā saaya ho gayā

jis se thā dil kī harārat ko sarāsar inte.āsh

sāmne thiiñ leadiyāñ zehara-vash o jādū-nazar

yaañ javānī kī umañg aur un ko āshiq kī talāsh

us kī chitvan sehar-āgīñ us kī bāteñ dil-rubā

chaal us kī fitna-ḳhez us kī nigāheñ barq-pāsh

vo faroġh-e-ātish-e-ruḳh jis ke aage āftāb

is tarah jaise ki pesh-e-sham.a parvāne kī laash

jab ye sūrat thī to mumkin thā ki ik barq-e-balā

dast-e-sīmīñ ko baḌhātī aur maiñ kahtā dūr-bāsh?

donoñ jānib thā ragoñ meñ josh-e-ḳhūn-e-fitna-zā

dil hī thā āḳhir nahīñ thī barf kī ye koī qaash

baar baar aatā hai 'akbar' mere dil meñ ye ḳhayāl

hazrat-e-sayyad se jākar arz kartā koī kaash

'darmiyān-e-qa.ar-e-dariyā taḳhta-bandam-karda-ī

bāz-mī-goī ki dāman-tar makun-hushyār-bāsh

ek mis simin badan se kar liya london mein aqd

is KHata par sun raha hun tana-ha-e-dil-KHarash

koi kahta hai ki bas us ne bigaDi nasl-e-qaum

koi kahta hai ki ye hai bad-KHisal-o-bad-maash

dil mein kuchh insaf karta hi nahin koi buzurg

ho ke ab majbur KHud is raaz ko karta hun fash

hoti thi takid london jao angrezi paDho

qaum-e-english se milo sikho wahi waza-e-tarash

jagmagate hoTalon ka ja ke nazzara karo

soup o karri ke maze lo chhoD kar yaKHni o aash

lidaron se mil ke dekho un ke andaz-o-tariq

hall mein nacho clab mein jake khelo un se tash

baada-e-tahzib-e-europe ke chaDhao KHum ke KHum

asia ke shisha-e-taqwa ko kar do pash pash

jab amal is par kiya pariyon ka saya ho gaya

jis se tha dil ki hararat ko sarasar inteash

samne thin leadiyan zehara-wash o jadu-nazar

yan jawani ki umang aur un ko aashiq ki talash

us ki chitwan sehar-agin us ki baaten dil-ruba

chaal us ki fitna-KHez us ki nigahen barq-pash

wo farogh-e-atish-e-ruKH jis ke aage aaftab

is tarah jaise ki pesh-e-shama parwane ki lash

jab ye surat thi to mumkin tha ki ek barq-e-bala

dast-e-simin ko baDhati aur main kahta dur-bash?

donon jaanib tha ragon mein josh-e-KHun-e-fitna-za

dil hi tha aaKHir nahin thi barf ki ye koi qash

bar bar aata hai 'akbar' mere dil mein ye KHayal

hazrat-e-sayyad se jakar arz karta koi kash

'darmiyan-e-qar-e-dariya taKHta-bandam-karda-i

baz-mi-goi ki daman-tar makun-hushyar-bash